Gəncə-Daşkəsən regionunda müəllimlər üçün USTAD dərslərinə başlanıldı
Gəncə-Daşkəsən Regional Təhsil İdarəsinin (GDRTİ) təşkilatçılığı ilə müəllimlərin peşəkar inkişafına yönəlmiş ustad dərslər həyata keçirilir.
Aztəhsil.az xəbər verir ki, regional təhsil idarəsinin təşkilatçılığı ilə keçirilən ilk ustad dərsdə Gəncə-Daşkəsən Regional Təhsil İdarəsinin müdiri Elçin Kərimov, müdir müavini Elmin Məmmədtağıyev, yerli təhsil sektorlarının müdirləri, idarə əməkdaşları və qabaqcıl müəllimlər iştirak ediblər.
Layihənin əsas məqsədi müəllimlərin peşəkar bacarıqlarını inkişaf etdirmək, qabaqcıl tədris təcrübələrinin paylaşılmasına şərait yaratmaq və ümumi tədris keyfiyyətini daha da yüksəltməkdir. Bu çərçivədə keçirilən ustad dərslər həm praktik yanaşmaların nümayişi, həm də pedaqoji müzakirə mühiti baxımından xüsusi əhəmiyyət daşıyır.
Ustad dərs Gəncə şəhər İ.Nəsimi adına 44 nömrəli məktəb-liseyin ibtidai sinif müəllimi Vəfa Baxışova tərəfindən tədris edilib. O, 4-cü sinifdə Azərbaycan dili fənni üzrə nümunəvi dərs təqdim edib. Dərs zamanı müasir tədris metodlarından istifadə olunub, şagirdlərin fəal iştirakı təmin edilib və interaktiv yanaşmalar tətbiq edilib.
Ustad dərsin daha geniş təhsil ictimaiyyətinə çatdırılması məqsədilə dərs prosesi texniki vasitələrlə qeydə alınıb. Eyni zamanda, dərs digər otaqda təhsil işçiləri tərəfindən canlı şəkildə izlənilib ki, bu da daha çox müəllimin prosesdən faydalanmasına imkan yaradıb.
Dərsin sonunda geniş müzakirə aparılıb, iştirakçılar arasında fikir mübadiləsi həyata keçirilib və təcrübə paylaşımı təmin olunub.
Gəncə-Daşkəsən Regional Təhsil İdarəsinin müdiri Elçin Kərimov bildirib ki, bu cür ustad dərslər müəllimlərin inkişafında mühüm rol oynayır və bu təşəbbüs müəllimlər arasında əməkdaşlığı gücləndirir, innovativ yanaşmaların tətbiqini təşviq edir, eyni zamanda təhsilin keyfiyyətinin yüksəldilməsinə xidmət edir. O əlavə edib ki, qarşıdakı dövrdə də bu formatda ustad dərslərin digər ümumi təhsil müəssisələrində davam etdirilməsi nəzərdə tutulur.
Qeyd edək ki, ustad dərslərin bu formatda təşkili regionun müxtəlif ümumi təhsil müəssisələrində davamlı şəkildə həyata keçiriləcək.
