Məktəb direktoru qanunu pozub - Vəkil DANIŞDI

Xəbər verdiyimiz kimi, Qax rayonunun Şotavar kənd tam orta məktəbinin direktoru 9-cu sinif buraxılış imtahanında aşağı nəticə göstərən şagirdlərlə görüş keçirərək onları peşə təhsilinə yönləndirmək məqsədilə söhbət aparıb. Həmin görüşün görüntüləri isə şagirdlərin üzü açıq formada sosial şəbəkədə paylaşılıb.

Bəs şagirdlərin üzlərinin açıq formada sosial şəbəkədə paylaşılması qanuna uyğundurmu?

Vəkil Roman Qaraşov Redaktor.az-a bildirdi ki, təhsil müəssisəsi tərəfindən azyaşlı şagirdlərin şəxsi məlumatlarının, o cümlədən fotoşəkillərinin onların akademik nailiyyətləri və ya intizam göstəriciləri ilə əlaqəli şəkildə ictimaiyyətə açıq platformalarda yayılması Azərbaycan Respublikasının “Fərdi məlumatlar haqqında” və “Uşaq hüquqları haqqında” qanunların prinsiplərinə ziddir.

Həmsöhbətimizin sözlərinə görə, uşağın təhsil nəticələri onun fərdi məlumatı hesab olunur və bu cür məlumatların valideynin və ya qanuni nümayəndənin əvvəlcədən yazılı razılığı olmadan ictimailəşdirilməsi uşağın şərəf və ləyaqətinə mənfi təsir göstərə, həmçinin onun psixoloji durumuna zərər vura bilər:

"Bu, eyni zamanda “təqsirsizlik prezumpsiyası” və konfidensiallıq prinsiplərinin pozulması kimi qiymətləndirilə bilər.

İnzibati-hüquqi baxımdan, təhsil müəssisələrinin sosial şəbəkə hesablarında bu qəbildən olan məlumatların paylaşılması pedaqoji etika normalarının kobud pozuntusu olmaqla yanaşı, şəxsi məlumatların işlənməsi qaydalarının pozulmasına görə məsuliyyət riskləri yaradır. Şagirdlərin zəif nəticələri ilə bağlı aparılan maarifləndirici işlər konfidensial xarakter daşımalı və bu proses yalnız şagirdin qanuni nümayəndəsi ilə qapalı formatda həyata keçirilməlidir. Əks halda, zərərçəkən tərəf (valideyn) qanunvericiliyə əsasən məktəb rəhbərliyindən paylaşımın dərhal silinməsini tələb edə və mənəvi zərərin ödənilməsi üçün məhkəməyə müraciət edə bilər”.