Peşə Agentliyi şou göstərir- Bərbər kursunun imtahanını katibələr götürüb?- FOTO
Peşə Təhsili üzrə Dövlət Agentliyi rəsmi "Facebook" hesabında mütəmadi olaraq agentliyin və tabeliyində fəaliyyət göstərən peşə təhsil mərkəzlərinin fəaliyyəti ilə bağlı paylaşımlar edir, müxtəlif layihələr və uğurlar ictimaiyyətə təqdim olunur.
Bu günlərdə agentliyin növbəti paylaşımı diqqət çəkib.
Paylaşımda bildirilir: "Azərbaycan Respublikasının işğaldan azad edilmiş ərazilərinə Böyük Qayıdışa dair Dövlət Proqramı çərçivəsində Turizm və Sosial Xidmətlər üzrə Bakı Dövlət Peşə Təhsil Mərkəzində bərbər ixtisası üzrə qısamüddətli təlim başa çatıb. Qeyd edək ki, təlimi uğurla başa vuran şəxslərə əmək fəaliyyətinə başlamağa imkan verən dövlət nümunəli sertifikat təqdim edilir."
Paylaşımda həmçinin kursun yekun mərhələsini, imtahan və qiymətləndirmə prosesini əks etdirən fotolar da yer alıb.
Məhz həmin fotolar olrataya maraqlı mənzərə çıxarıb.
Belə ki, fotolarda imtahan komissiyası kimi stol arxasında əyləşən dörd xanım görünür. Onlardan birinin Turizm və Sosial Xidmətlər üzrə Bakı Dövlət Peşə Təhsil Mərkəzinin direktor müavini Nuranə Məmmədova olduğu bildirilir. Maraqlıdır, bərbər ixtisası üzrə keçirilən yekun qiymətləndirmədə iştirak edən digər şəxslər kimlərdir və onların bu ixtisas üzrə peşə səriştəsi varmı?
Əvvəllər sözügedən peşə məktəbində çalışan və bu şəxsləri tanıyan şəxs Təhsilmedia.com-a bildirib ki, komissiyada əyləşən şəxslərdən biri Nuranə Məmmədovanın köməkçisi (katibəsi), digəri isə mərkəzin digər direktor müavini Reyhan müəllimənin katibəsidir.
Bəs dördüncü şəxs kimdir? Reyhan müəllimə bu şəxsi tanıyırmı və onunla hər hansı qohumluq əlaqəsi mövcuddurmu?
Dövlət vəsaiti hesabına təşkil olunan, hər gün geniş şəkildə təbliğ edilən peşə kurslarında yekun qiymətləndirmənin ixtisas müəllimləri və ya sahə üzrə mütəxəssislər tərəfindən deyil, köməkçi və katibələr tərəfindən aparılması olduqca acınacaqlı mənzərədir.
Hörmətli Agentliyin direktoru İlqar Bayramlı - Peşə təhsilinin keyfiyyəti və bu sertifikatların etibarlılığı baxımından belə yanaşma nə dərəcədə düzgündür?
