Xırdalan şəhər 3 saylı məktəb-liseydə "Zəfər Günü" böyük təntənə ilə qeyd olunub - FOTOLAR
Bir neçə gündən sonra Azərbaycanın tarixi qələbəsini özündə əks etdirən 8 noyabr "Zəfər Günü" bütün Respublikada böyük təntənə və coşğu ilə qeyd olunacaq. Amma ölkənin əksər idarə və müəssisələri, təhsil ocaqları bu möhtəşəm bayrama sayılı günlər qalmış tədbirlərə start veriblər. Bir sözlə, ölkədə əsl bayram abu-havası hiss olunur.
tehsil.media xəbər verir ki, "Zəfər Günü" ilə bağlı möhtəşəm tədbirlərdən biri də Bəxtiyar Cəfərov adına Xırdalan şəhər 3 saylı məktəb-liseydə keçirilib. Məktəbin müəllim və şagird kollektivi, eləcə də şəhid və qazi ailələri bir araya gələrək Azərbaycanın şanlı qələbəsinin simvoluna çevrilən 8 noyabr "Zəfər Günü"nü qeyd edib.
Tədbirdə çıxış edən məktəbin direktoru Sevinc Məmmədəliyeva 8 Noyabr tarixinin Zəfər Günü kimi təntənəli səkildə qeyd edilməsindən qürür duyduğunu deyib. O, hərbçilərimizin cəsarətindən, qəhrəmanlığından və Ali Baş Komandan, Prezident İlham Əliyevin Zəfər səlnaməsindən bəhs edib. Sevinc Məmmədəliyeva bildirib ki, Prezident, Silahlı Qüvvələrin Ali Baş Komandanı İlham Əliyevin müdrik siyasəti və şanlı Ordumuzun rəşadəti sayəsində qazanılmış böyük Zəfər, eyni zamanda, dinindən, milli mənsubiyyətindən asılı olmayaraq, xalqımızın “dəmir yumruq” ətrafında sıx birləşməsi, gənclərimizin Vətən sevgisi, iqtidar-xalq və ordu birliyi sayəsində əldə olunub.
Tədbirdə çıxış edən şəhid ailələri və digər qonaqlar "Zəfər Günü"nün tarixi əhəmiyyətindən söz açıblar. Çıxışçılar bildiriblər ki, 8 Noyabr "Zəfər Günü" birliyimizin və milli iradəmizin rəmzi kimi Azərbaycanın tarixinə qızıl hərflərlə əbədi həkk olunub. Bu böyük Qələbə Azərbaycan Prezidenti, Ali Baş Komandan İlham Əliyevin qətiyyəti, uzaqgörənliyi, müdrik rəhbərliyi və dəqiq planları, həmçinin cəsarəti, şücaəti və müzəffər Ordumuza böyük inamı sayəsində qazanılıb.
Daha sonra tədbir məktəbin şagirdlərinin hazırladığı ədəbi-bədii kompazisiyalarla davam edib. Şagirdlərin hərbi formada səsləndirdiyi qəhrəmanlıq marşları və şeirlər tədbir iştirakçıları tərəfindən alqışlarla qarşılanıb.
Müşviq Tofiqoğlu
TƏHSİL MEDİA
