Vahid forma, yoxsa peşəkar görünüş? – Müəllimdən maraqlı MÖVQE

Milli Məclisin Elm və təhsil komitəsinin iclasında müzakirəyə çıxarılan “Ümumi təhsil haqqında” qanuna təklif edilən dəyişikliklərdən biri də müəllimlərin geyimi ilə bağlı hüquqi əsasın yaradılmasıdır. Layihəyə əsasən, dövlət ümumi təhsil müəssisələrində təhsilverənlərin işgüzar geyim qaydalarına riayət etməsi qanunvericilik səviyyəsində tənzimlənəcək.

Mövzu ilə bağlı Redaktor.az-a danışan Zəngilan şəhəri 33 nömrəli məktəbin ingilis dili müəllimi, Elm və Təhsil Nazirliyi yanında İctimai Şuranın katibi Günay Əkbərova düşünür ki, bu məsələyə bir qədər geniş baxmaq lazımdır.

"Şəxsən mən müəllimlər üçün peşəkar geyim standartlarının olmasını normal və hətta faydalı hesab edirəm. Çünki müəllim yalnız dərs deyən şəxs deyil, həm də məktəbin simasını və dəyərlərini təmsil edən insandır. Amma vahid forma məsələsinə gəldikdə, burada balansın qorunması vacibdir. Dünyanın bir çox inkişaf etmiş təhsil sistemlərində müəllimlər üçün tam eyni forma tətbiq edilmir. Daha çox peşəkar, səliqəli və işgüzar görünüş prinsiplərinə üstünlük verilir. Məsələn, Böyük Britaniya, ABŞ və bir sıra Avropa ölkələrində müəllimlərin necə görünməli olduğuna dair ümumi qaydalar mövcuddur, lakin hər kəs eyni geyimi geyinmir. Məncə, əsas məqsəd müəllimləri eyniləşdirmək deyil, məktəbdə peşəkar mühiti gücləndirmək olmalıdır. Müəllimin nüfuzu ilk növbədə onun biliyi, davranışı və şagirdlərlə münasibəti ilə formalaşır. Geyim isə bu peşəkarlığı tamamlayan amillərdən biridir. Əgər gələcəkdə bu istiqamətdə hansısa qərarlar qəbul olunacaqsa, müəllimlərin rahatlığı, fikirləri və məktəblərin real şəraiti də mütləq nəzərə alınmalıdır. Mənim fikrimcə, vahid formadan daha çox vahid peşəkar görünüş standartlarının tətbiqi həm dünya təcrübəsinə, həm də bizim məktəblərin reallıqlarına daha uyğun yanaşma olar", - deyə o yekunlaşdırdı