Vahid müəllim geyimi: Yeni biznes layihəsi, yoxsa hicab qadağası üçün bəhanə?
Son günlər müəllimlərin geyim forması ciddi mübahisə mövzusuna çevrilib. Açığı, müəllimlərin vahid geyim formasına keçirilməsi təşəbbüsünün arxasında, fikrimcə, iki əsas səbəb dayana bilər:
1. "Biznes maraqları və yeni layihə:" Bazarda kimlərinsə öz parça və geyimlərini satmaq istəyi. Bu, yeni bir biznes layihəsidir və müəllimlər məcburən məhz həmin formaları almalı olacaqlar. Nəticədə, bu proses hansısa geyim/tikiş şirkətinin büdcəsinə xidmət edəcək.
2." Hicablı müəllimlərə qarşı bəhanə:" Bu addım hicablı müəllimləri məktəbdən uzaqlaşdırmaq üçün bir bəhanəyə çevrilə bilər.
Hər bir halda, mən müəllimlərin vahid geyim formasına keçməsinin tərəfdarı deyiləm.
Müəllimlərimiz onsuz da öz adına layiq, çox gözəl və nümunəvi geyimlərdə məktəbə gəlirlər. Əgər bir-iki gənc müəllim geyiminə yetərincə diqqət yetirmirsə, bunun üçün onsuz da Müəllimlərin Etik Davranış Qaydalarında "mədəni davranış" prinsipi mövcuddur. Həmin prinsip düzgün geyim qaydalarını da tənzimləyir və bu tamamilə kifayətdir.
Məsələnin digər maraqlı və təəssüf doğuran tərəfi isə müzakirələrin yalnız qadın müəllimlərin üzərində qurulmasıdır. Qadınlar bizim analarımız, bacılarımız, övladlarımızı etibar etdiyimiz müqəddəs insanlardır. Əgər geyim standartlarından danışırıqsa, heç olmasa elementar etika xatirinə kişi müəllimlərin də geyimindən bəhs edilməlidir. Unutmayaq ki, müasir dövrdə "fərqli" və qeyri-adi geyimlərə üstünlük verən, bununla da etika qaydalarını pozan kişilər də var. Lakin nədənsə onlar barədə heç bir söhbət açılmır. Bu yanaşma da yuxarıda qeyd etdiyim iki səbəbin nə dərəcədə doğru olduğunu bir daha sübut edir.
Tehsilmedia.info saytının baş redaktoru Sakit Muradov
