Məktəblilərimizi qoruyaq: Nə ifrat açıq-saçıqlıq, nə də dini basqı!

Məktəblilərimizi qoruyaq: Nə ifrat açıq-saçıqlıq, nə də dini basqı!
Uşaqların dinə etiqad etməyə məcbur olunması qadağan edilir.

Bu, parlamentin Ailə, qadın və uşaq məsələləri komitəsinin bu gün keçirdiyi iclasında müzakirə edilib. Məktəblərdə vahid geyim və davranış forması olması barədə müzakirələr bundan əvvəl də olub.

Modern.az daim bu məsələni diqqətdə saxlayıb və bununla bağlı çox maraqlı yazı gedib. Həmin yazıda orta məktəblərdə vahid geyim və davranış formalarına toxunulub.

Hamımız bilirik ki, məktəb ancaq bilik verilən məkan kimi qiymətləndirilməməlidir. Bunu bilməyən yoxdur. Məktəb insan yetişdirilən yerdir. Şəxsiyyətin formalaşdığı, dəyərlərin aşılandığı, gələcəyin qurulduğu məkandır. Ona görə də məktəbdə hər şey sistemli, ölçülü və məsuliyyətli olmalıdır. İnsanın gələcəyi məktəbdən başlayır.

Odur ki, vahid geyim və vahid davranış forması təsadüfi anlayış sayılmır. Bu, intizamın, bərabərliyin və tərbiyənin görünən üzüdür. Standartlar boş yerə yaradılmayıb. Onlar cəmiyyətin uzun illərin təcrübəsindən süzülüb gələn ehtiyacıdır.

Əvvəllər məktəblərdə təlim-tərbiyə üzrə direktor müavinləri vardı. Onlar təkcə dərs cədvəlinə baxmırdılar. Şagirdin davranışına, geyiminə, danışıq tərzinə diqqət edirdilər. Sinif rəhbərləri vardı və bu ad formal deyildi. Sinif rəhbəri az qala sinfin ağsaqqalı, ağbirçəyi idi.

Ədəb, ərkan deyilən anlayışlar vardı. Bunlara hamı əməl edirdi. Şagird də bilirdi, valideyn də bilirdi, müəllim də. Bu qaydalar kimisə sıxmaq üçün yox, hamını qorumaq üçün idi.

İndi baxırsan, bir şagird saqqallı gəlib məktəbə. “Öz işidir” deyib keçirik. O biri oğlan sırqa taxıb gəlir, heç nə olmamış kimi yanaşırıq. Digər oğlan az qala qız geyimi geyinib gəlir, “sərbəstlikdir” deyib göz yumuruq. Amma sual vermirik, sonra nə olacaq?

Vallah bu, sərbəstlik deyil. Bu, məsuliyyətsizlikdir, gələcəyə biganəlikdir.

Bəzən qızlarımıza baxırsan. Bəziləri çox mini geyimlə dərsə gəlirlər. Açıq-saçıq geyim məktəb mühitinə çevrilir. “Bizim qızımız deyil” deyib keçirik. Amma məktəbdə oxuyan hər qız bizim qızımızdır.

Digər tərəfdən, bəzi qızlar dini-ideoloji geyimlərlə gəlirlər. Hicab, niqab, çarşabla məktəbə gələn şagirdlər var. Yenə də “eyvallah” deyib susuruq. Amma düşünmürük ki, məktəb ideoloji yox, dünyəvi məkan olmalıdır. Məktəb uşağı cəmiyyətə hazırlamalıdır, qruplara yox. Məktəb dövlətini, xalqın maraqlarına xidmət etməlidir, hansısa gizlin qüvvələrin yox.

Ay məktəb direktorları, siz hara baxırsınız? O uşaqlar tək valideynin deyil. Onlar hamımızın uşaqlarıdır. Onlar Azərbaycanın gələcəyidir. Biz hər bir uşağa öz övladımız kimi baxmalıyıq. Sırqa taxan oğlanla dini idelogiyanı yayan hicabı, niqabı geyinən qızın heç bir fərqi yoxdur.

Vahid geyim və davranış formasını pozan hallara qarşı mövqe göstərməliyik. Susmaq məsuliyyətdən qaçmaqdır. Göz yummaq təhlükəni böyütməkdir. Vallah da belədir, billah da belədir.

Əziz valideynlər, sizin üzərinizə böyük məsuliyyət düşür. Uşağı məktəbə göndərib məsuliyyəti tam məktəbin üzərinə atmaq olmaz. Evdə tərbiyə verilməyən uşaq məktəbdə möcüzə yaratmır. Uşaqlarınızın geyiminə, davranışlarına xüsusi diqqət edin. Valideyn məktəblə eyni cəbhədə dayanmalıdır.

Bu məsələdə yad təsirlərə qarşı da ayıq olmalıyıq. İfrat açıq-saçıqlıq, dini ideoloji basqı uşaqlar üçün doğru yol deyil. Bizim balalarımız ideologiya üçün yox, Vətən üçün böyüməlidir.

Gəlin hamılıqla gül balalarımızı qoruyaq. Onları həm açıq-saçıq geyimdən, həm də ideoloji geyim təzyiqindən uzaq saxlayaq. Çünki gələcəyimiz onların çiyinlərindədir. Onları qorumaqla əslində öz gələcəyimizi qoruyuruq. Onları doğru istiqamətləndirmək Azərbaycanın gələcəyini qorumağımız deməkdir.

Məktəbdə vahid geyim və davranış forması olmalıdır. İnanın, bu, qadağa deyil, qayğıdır, məhdudiyyət deyil, məsuliyyətdir. Və bu məsuliyyət hamımızındır.

Çünki bu gün vahid geyim və davranış həddimizi bilməsək, sabah hərəkətlərimizi tənzimləməyi bacarmayacağıq. Bu gün bu məsələlərin qarşısını almasaq sabah gec olacaq.