Bu vaxtdan bütün dərslər robotlar vasitəsilə idarə olunacaq - AÇIQLAMA
"Süni intellekt artıq demək olar ki, həyatımıza tamamilə daxil olub və bu sahənin təqdim etdiyi imkanlardan təhsil sektorunda da maksimum şəkildə istifadə olunmalıdır. Dünyanın bir çox ölkələri artıq süni intellekti tədris proqramlarına daxil edib və müxtəlif təhsil pillələrində süni intellektin tədrisi həyata keçirilir. Xüsusilə, Şərq ölkələrindən Çin, Yaponiya və Cənubi Koreya kimi dövlətlər birbaşa ibtidai təhsil səviyyəsindən süni intellektin tədrisinə başlayıblar. Çin bu sahədə daha irəlidədir və demək olar ki, qabaqcıl ölkədir".
Bu fikirləri Redaktor.az-a açıqlamasında təhsil eksperti Elçin Əfəndi süni intellektin tədris proqramına daxil edilməsinin vacibliyindən danışarkən bildirdi.
O, hesab edir ki, ölkəmizdə də süni intellektin tədrisinə ən azından ibtidai təhsil pilləsinin 3-4-cü siniflərindən başlanmalıdır.
"Bu, təhsil prosesində süni intellektin imkanlarından faydalanaraq şagirdlərin həm təhsil, həm də akademik göstəricilərinə müsbət təsir göstərəcəkdir. Müasir dövrdə informasiya texnologiyalarının sürətlə inkişaf etdiyi bir vaxtda süni intellektin öyrənilməsi gələcək təhsil sistemini tamamilə fərqli şəkildə inkişaf etdirəcək. Yəqin ki, 15-20 ildən sonra bütün dərslərin və tədris proseslərinin süni intellektlər və süni intellekt əsaslı robotlar vasitəsilə idarə olunmasını görəcəyik. Buna görə də tam orta təhsil müəssisələrində süni intellektin bir fənn olaraq və ya müstəqil tədris proqramı kimi tətbiqi artıq vacib və əhəmiyyətlidir", - deyə mütəxəssis yekunlaşdırdı.
