Elə universitetlər var ki, qəbul siyasətində daha SƏRBƏST yanaşma tətbiq edirlər - "kim istəyir gəlsin" yanaşmasını seçirlər

Dövlət İmtahan Mərkəzinin sədri Məleykə Abbaszadə bildirib ki, imtahanlara əlavə 15 dəqiqə vaxt verilməsi ilə bağlı məsələ hələ Nazirlər Kabineti tərəfindən təsdiqlənməyib.

Aztəhsil.az xəbər verir ki, o bu barədə Dövlət İmtahan Mərkəzində abituriyentlər, valideynlər və pedaqoji ictimaiyyət nümayəndələri ilə keçirilən açıq görüşdə məlumat verib.

Onun sözlərinə görə, məsələ ilə bağlı hüquqi prosedurlar artıq həyata keçirilib və müvafiq sənədlər Nazirlər Kabinetinə təqdim olunub. Təklifin əsaslandırılmış şəkildə hazırlandığı və yaxın zamanda təsdiqlənəcəyi gözlənilir.

Məleykə Abbaszadə qeyd edib ki, bəzi universitetlər abituriyentlərin xarici dil səviyyəsi ilə bağlı müəyyən narazılıqlar bildirirlər:

"Onların hər birinin öz yanaşması və seçim hüququ var. Həmin ali təhsil müəssisələri tələb edə bilər ki, xarici dildən 40 faizdən yuxarı nəticə göstərən abituriyentlər yalnız onları seçə bilsinlər. Lakin elə ali məktəblər də var ki, qəbul siyasətində daha sərbəst yanaşma tətbiq edirlər - "kim istəyir gəlsin" yanaşmasını seçirlər. Amma siz də anlayırsınız ki, bu hansı universitetlərdir...”, - deyə o vurğulayıb.

Sədr əlavə edib ki, gələcəkdə esse tələbi tətbiq olunarsa, bəzi universitetlər qəbul prosesində essedən də müsbət nəticə tələb edə bilərlər:

"Bu dəyişikliklərlə bağlı qaydalar hələ müəllimlər üçün rəsmi şəkildə qüvvəyə minməyib. Biz yalnız ekspert müzakirələri barədə məlumat vermişik. Biz açığıq, amma bu o demək deyil ki, müəllimlər bunu şagirdlərə indidən qəti qayda kimi təqdim edib narahatlıq yaratsınlar".