“Doğru seçim, parlaq gələcək” mövzusunda abituriyentlərlə görüş keçirilib.

Bakı Mühəndislik Universiteti və Abşeron-Xızı Regional Təhsil İdarəsinin birgə təşkilatçılığı ilə
“Doğru seçim, parlaq gələcək” mövzusunda abituriyentlərlə görüş keçirilib.

Görüşdə Regional Təhsil İdarəsinin rəhbərliyi, rayon ümumtəhsil müəssisələrinin direktorları, yuxarı sinif şagirdləri və universitetin professor-müəllim heyəti iştirak edib. Tədbirin əvvəlində şəhidlərimizin əziz xatirəsi yad olunub, Azərbaycan Respublikasının Dövlət Himni səsləndirilib.

Daha sonra universitetin akademik mühiti, maddi-texniki bazası və son illərdə əldə etdiyi uğurları əks etdirən videoçarx nümayiş olunub.

Açılış nitqi ilə çıxış edən universitetin rektoru Yaqub Piriyev ali təhsil müəssisəsinin inkişaf istiqamətləri, ixtisas imkanları və beynəlxalq əməkdaşlıq perspektivləri barədə ətraflı məlumat verib.

Bildirilib ki, universitetdə müasir əmək bazarının tələblərinə uyğun olaraq müxtəlif ixtisaslar üzrə yüksəkixtisaslı kadr hazırlığı həyata keçirilir, yeni ixtisas və ixtisaslaşmaların tətbiqi davam etdirilir.

Tədbirdə çıxış edən Regional Təhsil İdarəsinin müdiri İlhamə Abdullayeva bu kimi görüşlərin abituriyentlərin düzgün ixtisas seçimi etməsində mühüm rol oynadığını vurğulayıb. O, gənclərə gələcək karyeralarını planlaşdırarkən maraq və bacarıqlarını nəzərə almalarını tövsiyə edib.

Görüş çərçivəsində abituriyentlər universitetin laboratoriyaları, Texnoparkı və innovativ təhsil mühiti ilə yaxından tanış olmaq imkanı əldə ediblər.