Elxan Nəcəfov: İlk gündə müəllimlərin 93 faizi uğur qazanıb
“Mayın 2-dən Naxçıvan Muxtar Respublikasında müəllimlərin sertifikatlaşdırma prosesinin II dövriyyə imtahanı başlayıb. Ümumilikdə, 4 gün ərzində 2779 qeydiyyatdan keçmiş müəllimin iştirak etməsi nəzərdə tutulur”.
Bu barədə “Azərbaycan müəllimi”nə açıqlamasında Naxçıvan MR-in təhsil naziri Elxan Nəcəfov bildirib. O qeyd edib ki, ilk imtahan günündə 760 müəllim iştirak edib və iştirak edənlərin təxminən 93 faizi uğur qazanıb. Uğur qazananların demək olar ki, yarısı 51 baldan yuxarı nəticə göstərib, digər hissə isə 30-50 bal aralığında bal toplayıb. Nazir əlavə edib ki, bu prosesdə müəllimlərin əməkhaqlarının 35 faizədək artırılması nəzərdə tutulur: "İmtahanın ikinci günündə mediatur təşkil olunub. Müxtəlif qurumları təmsil edən ictimai və rəsmi şəxslər proseslə tanış olub, imtahanın şəffaf, rəqəmsal qaydada təşkili və təhlükəsizliyin təmin olunmasını müşahidə ediblər".
Nazir bildirib ki, ikinci imtahan günündə riyaziyyat, kimya və biologiya fənləri üzrə imtahanlar keçirilir və iştirak edən müəllimlərin uğur qazanacağına inanılır :"İlk gündə 6 müəllim maksimum bal toplayıb ki, onların 5-i ingilis dili, 1-i isə Azərbaycan dili müəllimidir".
Elxan Nəcəfov hesab edir ki, əldə olunan nəticələrin növbəti imtahan günlərində iştirak edəcək müəllimlər üçün motivasiya yaradacağı və prosesin sonunda daha bilikli, bacarıqlı müəllimlərin seçiləcəyi gözlənilir.
