Tarix fənni müəllimləri ilə görüş keçirilib

Abşeron-Xızı Regional Təhsil İdarəsinin tabeliyində fəaliyyət göstərən ümumtəhsil müəssisələrində tarix fənnini tədris edən müəllimlərə metodiki dəstək göstərilməsi məqsədilə görüş keçirilib.

Tədbirdə fənn kurikulumu, dərslik və metodik vəsaitlərin müəllifləri — Bakı şəhər 163 nömrəli tam orta məktəbin müəllimi Ramil Tanrıverdi, Heydər Əliyev adına Liseyin tarix müəllimi Hafiz Cabbarov və Bakı şəhər 327 nömrəli tam orta məktəbin müəllimi Talıb Talıblı iştirak edərək müəllimlərlə peşəkar müzakirələr aparıblar.

Görüşün əsas istiqamətlərindən birini tarix müəllimlərinin sertifikasiya prosesi təşkil edib. Müəllimlərə prosesin gedişatı barədə ətraflı məlumat verilib, onları maraqlandıran suallar cavablandırılıb.
Eyni zamanda dərsliklərdə aparılan yeniliklər, tədrisdə effektiv metodların tətbiqi, şagirdlərdə analitik düşünmə və səbəb-nəticə əlaqələrinin formalaşdırılması kimi XXI əsr bacarıqlarının inkişafı məsələləri ətrafında fikir mübadiləsi aparılıb.
İnteraktiv formatda davam edən tədbirin sonunda müəllimlər göstərilən metodiki dəstəyə və faydalı məlumatlara görə mütəxəssislərə təşəkkürlərini bildiriblər.