Azərbaycanda ümumi təhsil müəssisələrinin sayı son 25 ildə azalıb
Azərbaycanda ümumi təhsil müəssisələrinin sayı son 25 ildə azalıb.
Tehsilmedia.com xəbər verir ki, bu barədə məlumat Dövlət Statistika Komitəsinin “Azərbaycanda uşaqlar” statistik məcmuəsində qeyd olunub.
Belə ki, 2000/2001-ci tədris ilində ölkə üzrə 4548 ümumi təhsil müəssisəsi olduğu halda, 2025/2026-cı tədris ilində bu göstərici 4195-ə düşüb. Məlumatlara əsasən, 2005/2006-cı tədris ilində ümumi təhsil müəssisələrinin sayı 4550-yə çatıb. Sonrakı illərdə isə müəssisələrin sayında mərhələli azalma müşahidə olunub.
Ən ciddi azalma ibtidai və ümumi orta məktəblərin sayında qeydə alınıb. Belə ki, ibtidai məktəblərin sayı 2000/2001-ci ildəki 470-dən 2025/2026-cı ildə 183-ə, ümumi orta məktəblərin sayı isə 922-dən 713-ə enib.
Tam orta məktəblərin sayı isə əksinə, artıb. 2000/2001-ci tədris ilində 3136 tam orta məktəb olduğu halda, 2024/2025-ci ildə bu göstərici 3342-yə yüksəlib. 2025/2026-cı tədris ilində isə tam orta məktəblərin sayı 3283 olub.
Sağlamlıq imkanları məhdud uşaqlar üçün xüsusi təhsil müəssisələrinin sayı da illər üzrə azalıb. 2000/2001-ci ildə 20 olan belə müəssisələrin sayı 2025/2026-cı ildə 16 təşkil edib.Təhsilalanların ümumi sayında da müxtəlif illərdə fərqli dinamika müşahidə olunub. 2000/2001-ci ildə 1 milyon 653,7 min nəfər olan təhsilalanların sayı 2010/2011-ci ildə 1 milyon 324,6 min nəfərə qədər azalıb. Sonrakı illərdə isə artaraq 2024/2025-ci ildə 1 milyon 695,1 min nəfərə çatıb. 2025/2026-cı ildə bu göstərici 1 milyon 674,6 min nəfər olub.
Müəllimlərin sayı isə 2000/2001-ci ildə 161,3 min nəfərdən 2010/2011-ci ildə 172,4 min nəfərə yüksəlib. Sonrakı illərdə azalma qeydə alınıb və 2025/2026-cı tədris ilində müəllimlərin sayı 143,7 min nəfər təşkil edib.
