Məktəbli çantasının ideal çəkisi nə qədər olmalıdır?
Tam yığılmış məktəbli çantasının çəkisi uşağın bədən kütləsinin 10%-dən çox olmamalıdır.
Tehsilmedia.com Oxu.az-a istinadən bildirir ki, bu barədə Rusiya Səhiyyə Nazirliyinin Rusiya Uşaq Klinik Xəstəxanasının Travmatologiya və Ortopediya şöbəsinin müdiri Aleksandr Sautenko RT-yə müsahibəsində danışıb.
Beləliklə, əgər uşağın çəkisi 25 kq-dırsa, çantanın çəkisini 2,5 kq-la məhdudlaşdırmaq məsləhətdir. 35 kq çəkisi olan uşaq üçün çantanın çəkisi 3,5 kq, 50 kq çəkisi olan yeniyetmə üçün isə icazə verilən yük təxminən 5 kq olmalıdır. Bu yanaşma şagirdin fərdi imkanlarını nəzərə almağa imkan verir.
Həddindən artıq ağır çanta uşağı başını irəli əyməyə, çiyinlərini bükməyə və bədəninin vəziyyətini dəyişməyə məcbur edir. Mütəmadi olaraq həddindən artıq yüklənmə zamanı yorğunluq, boyun və beldə ağrılar, məktəbdən və ya uzun gəzintilərdən sonra diskomfort kimi hallar yarana bilər.
Aleksandr Sautenko həmçinin uşağın boyuna uyğun çanta seçməyi, onun kürəyə möhkəm oturmasına, geniş və tənzimlənən qayışlara malik olmasına diqqət yetirməyi tövsiyə edir. Çantanı hər iki çiyində daşımaq lazımdır, ən ağır dərsliklər isə kürəyə daha yaxın hissədə yerləşdirilməlidir.
