Dövlət və özəl kolleclərdə çalışan professor və müəllimlərin SAYI

Azərbaycanda dövlət və qeyri-dövlət orta ixtisas təhsili müəssisələrində fəaliyyət göstərən professor-müəllim heyətinin sayında son illərdə dəyişiklik müşahidə olunur. 2000-ci illərin əvvəllərində artım meyli ilə yadda qalan bu sahədə son illərdə say azalmaları və struktur dəyişiklikləri diqqət çəkir.

AzEdu.az-ın Dövlət Statistika Komitəsindən əldə etdiyi məlumata əsasən, 2024–2025-ci tədris ilinin əvvəlində orta ixtisas təhsili müəssisələrində çalışan professor-müəllim heyətinin ümumi sayı 6,374 nəfər təşkil edib. Halbuki bu göstərici 2005–2006-cı illərdə maksimum həddə çataraq 6,813 nəfərə yüksəlmişdi. Son 10 ildə isə bu sahədə davamlı azalma müşahidə olunur. Məsələn, 2015–2016-cı ildə 7,126 nəfər olan heyət sayı, 2020–2021-ci ilə qədər 6,104 nəfərə düşüb.

Elmi dərəcəsi olan əməkdaşların sayı nisbətən sabit qalıb. 2024–2025-ci ildə fəlsəfə doktoru elmi dərəcəsinə malik müəllimlərin sayı 105 nəfər olub. Müqayisə üçün, 2010–2011-ci ildə bu göstərici 79 nəfər idi. Elmlər doktorlarının sayı isə azlıq təşkil edir. 2024–2025-ci ildə cəmi 11 nəfər. Bu rəqəm son illərlə müqayisədə stabil görünür.

Elmi ad daşıyan professor və dosentlərin sayında da maraqlı dəyişikliklər müşahidə olunur. Son tədris ilində professor adı daşıyanların sayı 10 nəfərə çatıb. Bu, 2000–2001-ci illə (12 nəfər) müqayisədə az da olsa artım deməkdir. Dosentlərin sayı isə son illərdə nəzərəçarpacaq dərəcədə artaraq 33 nəfərə çatıb. 2000–2001-ci ildə bu göstərici cəmi 6 nəfər idi.

Son 25 ildə Azərbaycanda orta ixtisas təhsili müəssisələrində çalışan professor-müəllim heyətinin ümumi sayında dalğavari dəyişikliklər müşahidə olunur. Elmi dərəcəli və elmi ad daşıyan müəllimlərin sayında müəyyən sabitlik və qismən artım müşahidə olunsa da, ümumi heyət sayının azalması bu sahədə kadr potensialının davamlı inkişafı üçün əlavə tədbirlərə ehtiyac olduğunu göstərir.