“İnnovativ məktəb” layihəsinin təqdimatı keçirilib
Bakı Şəhəri üzrə Təhsil İdarəsinin (BŞTİ) tabeliyindəki 56 nömrəli tam orta ümumtəhsil məktəbinin Təhsildə İnkişaf və İnnovasiyalar üzrə IX Qrant müsabiqəsində qalib olduğu “İnnovativ məktəb- kompleks inkişaf modeli” layihəsinin təqdimat mərasimi keçirilib.
AzEdu.az xəbər verir ki, tədbir iştirakçılarını salamlayan 56 nömrəli tam orta ümumtəhsil məktəbinin direktoru Könül Hüseynova təhsil ocağının son dövrlərdəki fəaliyyəti və əldə etdiyi uğurlara dair təqdimatla çıxış edib, “İnnovativ məktəb- kompleks inkişaf modeli” layihəsinin qarşıya qoyduğu məqsədlər barədə məlumat verib.
Mətbuat Şurasının sədri Rəşad Məcid təhsili idarəetmə qurumları ilə medianın qarşılıqlı və davamlı əməkdaşlığının vacibliyini qeyd edib, həmçinin media savadlılığının gənc nəslin formalaşmasında və təhsil prosesində strateji rol oynadığını diqqətə çatdırıb. R.Məcid layihənin icrasının məktəbdə innovativ yanaşmaların genişlənməsinə, təhsilin keyfiyyətinin yüksəldilməsinə və müasir tələblərə cavab verən məktəb modelinin formalaşmasına mühüm töhfə verəcəyinə ümidvar olduğunu vurğulayıb.
Təhsildə İnkişaf və İnnovasiyalar üzrə qrant müsabiqələrinin ölkə təhsilinin inkişafında oynadığı mühüm roldan danışan millət vəkilləri Ceyhun Məmmədov və Pərvanə Vəliyeva bu cür müsabiqələrin təhsil müəssisələrində innovativ təşəbbüslərin reallaşdırılmasına, qabaqcıl təcrübələrin formalaşmasına və müəllimlərin yaradıcılıq potensialının üzə çıxarılmasına geniş imkanlar yaratdığını vurğulayıblar.
Təhsildə Keyfiyyət Təminatı Agentliyinin İH-nin sədri Tural Əhmədov, BŞTİ-nin müdir müavini Anar Qədiməliyev, Təhsil İnstitutunun Metodiki Dəstək və Peşəkar İnkişaf Mərkəzinin direktoru Nəzakət Mehdiyeva, BŞTİ-nin Təhsilin keyfiyyətinə nəzarət sektorunun müdiri Zinyət Əmirova, Media və ictimaiyyətlə əlaqələr sektorunun müdiri Bəşarət Məmmədov, Bakı Nobel İrsi Fondunun direktoru Fuad Qasımov, Peşəkar Təlim və İnkişaf Mərkəzinin rəhbəri Nəcməddin Mehdiyev, “Azərbaycan məktəbi” jurnalının baş redaktoru Arzu Soltan, “Məktəb guşəsi” jurnalının baş redaktoru Məzahir Məmmədli, QHT nümayəndələri, məktəb direktorları və valideynlər çıxış edərək “İnnovativ məktəb-kompleks inkişaf modeli” layihəsini müasir çağırışlara cavab verən, məktəbin inkişafını kompleks şəkildə nəzərdə tutan dəyərli bir təşəbbüs kimi qiymətləndiriblər. Bildiriblər ki, müasir dövrdə təhsil sadəcə bilik ötürmək deyil, həm də innovativ düşüncə, yaradıcılıq, tənqidi təfəkkür və rəqəmsal bacarıqların formalaşdırılmasını tələb edir. Bu baxımdan layihənin məktəb idarəçiliyindən başlamış təlim-tədris prosesinə, müəllimlərin peşəkar inkişafından şagird nailiyyətlərinə, məktəb-icma əməkdaşlığına qədər geniş bir sahəni əhatə etdiyini diqqətə çatdırıblar.
Təqdimat mərasimində layihənin fəaliyyət planı, tərəfdaş təşkilatlarla birgə həyata keçiriləcək icra mexanizmləri və gözlənilən nəticələri barədə iştirakçılara ətraflı məlumat verilib.
Qeyd edək ki, “İnnovativ məktəb-kompleks inkişaf modeli” layihəsinin əsas məqsədi ümumi təhsil müəssisəsində müasir təlim metodlarının tətbiqi, rəqəmsal bacarıqların inkişafı, şagirdyönümlü və davamlı təhsil mühitinin formalaşdırılmasından ibarətdir. Layihə çərçivəsində idarəetmənin təkmilləşdirilməsi, müəllimlərin peşəkar inkişafı, şagird nailiyyətlərinin artırılması və valideyn-məktəb əməkdaşlığının gücləndirilməsi nəzərdə tutulur.
Sonda məktəb şagirdlərinin ifasında musiqili kompozisiyalar təqdim olunub.
