Doktorantura təhsili almaq istəyənlərə MÜHÜM XƏBƏR: "Aldanmamaq üçün bu qaydalara mütləq əməl edin, əks halda..."

“Azərbaycan vətəndaşlarının xaricdə aldığı doktorantura diplomları Təhsildə Keyfiyyət Təminatı Agentliyi deyil, Azərbaycan Respublikası Prezidenti yanında Ali Attestasiya Komissiyası tərəfindən tanınır. Diplomun tanınması üçün sənədlər əvvəlcə leqallaşdırılır və daha sonra Komissiyanın Rəyasət Heyətinə təqdim olunur”.

tehsilmedia.info saytıKONKRET.az-a istinada edərək bildirir ki, bu fikirləri açıqlamasında təhsil məsələləri üzrə ekspert Fuad Hacıyev səsləndirib.


“Doktorantura təhsili hərbi xidmətdən möhlət hüququ qazandırır və bu, mövcud qanunvericilikdə açıq şəkildə göstərilib. Lakin bəzi hallarda vətəndaşlar diplomun tanınması ilə bağlı ciddi çətinliklərlə qarşılaşırlar. Xüsusilə, bir sıra xarici universitetlər öz diplomlarını belə leqallaşdırmır. Nəticədə həmin ali təhsil müəssisələrində oxuyan Azərbaycan vətəndaşları təhsil haqqı ödəsələr də, 4 ildən sonra diplomlarının tanınmaması prosesi ilə üzləşirlər”.

Ekspert qeyd edir ki, məsələ ilə bağlı hərbi komissarlıqların da yanaşmasında ziddiyyətlər müşahidə olunur. Bəzən informasiya çatışmazlığı səbəbindən təqdim olunan bütün sənədlər qəbul edilir. Belə hallarda diplomlar nüfuzlu universitetlərə deyil, heç bir ölkə tərəfindən tanınmayan müəssisələrə aid olur.

“Qanunvericilikdə bakalavr pilləsini bitirən şəxslərin birbaşa doktoranturaya qəbul olunması mümkündür. Bu sistem “4+1” – yəni 1 il magistratura və 4 il doktorantura şəklində tətbiq edilir. Lakin hərbi komissarlıqlar bu praktikaya uyğun hərəkət etmir və magistratura diplomunun da təqdim olunmasını tələb edirlər. Qanunvericilikdə bununla bağlı xüsusi qayda nəzərdə tutulmadığından məsələ əlavə çətinliklər yaradır. Qeyd edək ki, hazırda Türkiyənin bir sıra dövlət universitetlərində və eləcə də Kuzey Kıbrıs Türk Cümhuriyyətində doktorantura pilləsi üzrə təhsil almaq mümkündür”.