BDU-da elmi seminar keçirilib - FOTO
Bakı Dövlət Universitetinin (BDU) Biologiya fakültəsində Tədqiqat, İnkişaf və İnnovasiyalar üzrə Mükəmməllik Mərkəzinin Biomühəndislik elmi-tədqiqat laboratoriyasının elmi işçisi, Molekulyar biologiya və biotexnologiyalar kafedrasının müəllimi Nurlan Əmrahovun “Müasir əkinçiliyin yeni istiqamətləri: hidroponika və akvaponika sistemləri” mövzusunda elmi seminarı keçirilib.
BDU-dan "tehsilmedia.info" a bildirilib ki, məruzəçi son illərdə Azərbaycan ərazisində torpaqların şoranlaşma prosesinin intensivləşməsi, əkin sahələrinin problemləri haqqında danışıb. Qeyd edib ki, problemin qarşısının alınması üçün meliorasiya, damcı suvarılma, üzvi gübrələr, vertikal drenaj, torpaqsız mühitdə - hidropon və akvapon sistemlərlə bitkilərin yetişdirilməsi metodlarından, üzvi gübrələrdən istifadə olunur. Meliorasiya effektiv metod olsa da, büdcə üçün əlverişsizdir. Bu, suyun israf olunmasına gətirib çıxarır. Məruzəçi tam sağlam və yüksək məhsuldarlığa malik birillik və ikiillik bitkilərin yetişdirilməsini hidropon və akvapon sistemlərin əsas üstünlüyü kimi göstərib. Qeyd edib ki, son illər dünyada çoxillik bitkilərin bu üsulla yetişdirilməsi üzrə də elmi tədqiqatlar aparılır.
Seminarda hidropon və akvapon sistemlərin sənayedə tətbiqi, istifadəsi, üstünlükləri və çatışmazlıqları diqqətə çatdırılıb. Bu sistemlərin iqtisadi səmərəliliyi və perspektivləri haqqında geniş müzakirələr aparılıb.
Sonda iştirakçıların sualları cavablandırılıb.
