Türkiyəli yazıçılar Ədəbiyyat Muzeyində olublar - FOTO

Türkiyənin tanınmış şairi, publisist və tədqiqatçısı Şükrü Sunay Akın yaxın məsləkdaşları Ali İhsan Genç və Samet Karahasanoğlu ilə birlikdə Nizami Gəncəvi adına Milli Azərbaycan Ədəbiyyatı Muzeyində olub.

Bu barədə "tehsilmedia.info"a Ədəbiyyat Muzeyindən məlumat verilib.

Bildirilib ki, muzeyi böyük maraqla gəzən ziyarətçilər qədim və zəngin Azərbaycan ədəbiyyatının keçdiyi inkişaf yolu ilə tanış olaraq, klassik və müasir şair və ədiblərin həyat və yaradıcılığı haqqında məlumatlar əldə ediblər.

Qonaqları muzeyin zəngin ekspozisiyası ilə filologiya üzrə fəlsəfə doktoru Sevinc Heydərova tanış edib.

Ekspozisiya zallarını gəzən Sunay Akın Türkiyənin tanınmış şairi Nazim Hikmətə və Azərbaycanın Xalq şairi Rəsul Rzaya sevgisini gizlədə bilməyib, onların şeirlərindən misralar səsləndirib.

Dünyanın hər yerində müxtəlif muzeyləri gəzdiyini qeyd edən şair öz ədəbiyyatını, mədəniyyətini və tarixini belə bir əzəmətli binada birləşdirib dünyaya tanıdan ikinci bir muzey görmədiyini söyləyib.

Sunay Akın sonda muzeyin “Rəy kitabı”nda öz təəssüratlarını bölüşüb: “Qibtə etdim, həsəd apardım! Bunları yazarkən həm çox sevincliyəm, həm də kədərli. Sevincliyəm ona görə ki, Azərbaycan belə gözəl, şair və yazıçılarının əsərləri ilə dolu bir muzeyə sahibdir. Kədərliyəm, ölkəmin belə bir muzeyə sahib olmadığı üçün!..”

Qeyd edək ki, Sunay Akın şəxsiyyəti və yaradıcılığı Türkiyədə hədsiz sevgi qazanıb. Şair “Yazarların İstanbulu”, “İstanbulun Nazim planı”, “Kırdığımız oyuncaqlar” və s. kitabların müəllifidir. Həmçinin TRT 2 və CNN türk kanallarında “İzler”, “Axşama doğru” proqramlarının müəllifi və aparıcısı olub. Sunay Akın Almaniyada Oyuncaq Muzeyini gəzdikdən sonra 2005-ci ildə Türkiyədə ailəsinə məxsus beşmərtəbəli imarətdə İstanbul Oyuncaq Muzeyini yaradıb. O, bu il Türkiyə Cümhuriyyətinin 100 illiyi münasibəti ilə Almaniyada dünyanın ən böyük oyuncaq muzeyi Nürnberq Oyuncaq Muzeyində sərgi açıb.