Türkiyədə valideynlər məktəbə icazəsiz daxil ola bilməyəcəklər
Türkiyədə 2026/2027-ci tədris ilindən məktəblərdə təhlükəsizlik, mobil telefon istifadəsi, müəllimlərin geyimi, sınaq imtahanları və valideynlərlə görüşlərlə bağlı bir sıra yeni qaydalar tətbiq olunacaq.
Tehsilmedia.com Türkiyə KİV-ə istinadən xəbər verir ki, Türkiyənin Milli Təhsil Nazirliyi yeni tədris ilində görüləcək iş və tədbirlərlə bağlı bütün vilayətlərə təlimat göndərib. Təlimata əsasən, 2026/2027-ci tədris ili sentyabrın 14-də başlayacaq.
Yeni qaydalara əsasən, məktəblərdə təhlükəsizlik tədbirləri gücləndiriləcək. Tədris ili başlamazdan əvvəl yerli təhsil qurumları məktəblərdə və onların ətrafında yarana biləcək riskləri nəzərdən keçirəcək və müvafiq tədbirlər planlaşdıracaq. Məktəblərə giriş-çıxış nəzarətdə saxlanılacaq, piyadalar və nəqliyyat vasitələri üçün hərəkət yolları ayrılacaq, qaranlıq və nəzarətdən kənar ərazilər işıqlandırılacaq. Fövqəladə vəziyyət zamanı təhlükəsiz təxliyəni təmin etmək üçün lazımi təmir işləri də tamamlanacaq.
Valideynlərin qəbula yazılmadan məktəbə girişinə icazə verilməyəcək
Valideynlərlə görüşlər ölkə üzrə yalnız “Məktəb Randevu Sistemi” vasitəsilə planlaşdırılacaq. Valideynlərin əvvəlcədən qəbula yazılmadan məktəbə gəlməsinə, həmçinin şagirdin valideyni və ya qanuni nümayəndəsi olmayan şəxslərin məktəbə daxil olmasına icazə verilməyəcək.
Müəllimlərin xüsusi geyim forması olacaq
Təhsil müəssisələrinin rəhbərləri, müəllimlər və digər təhsil işçilərindən vəzifələrini yerinə yetirərkən müəllimlik peşəsinin nüfuzuna, dövlət xidmətinin ciddiliyinə və ictimai həssaslıqlara uyğun davranmaları tələb olunacaq. Təlimatda onlar üçün xüsusi geyim forması nəzərdə tutulub. Bu məsələ ilə bağlı tədris ilinin əvvəlində müəllimlər şurasında məlumatlandırma aparılacaq və qaydalara əməl olunmasına yerli təhsil idarələri tərəfindən nəzarət ediləcək.
Məktəblərdə mobil telefon istifadəsi məhdudlaşdırılacaq
Şagirdlərin sinifdə mobil telefon istifadə etməməsi ilə bağlı mövcud qayda davam etdiriləcək. Müəllimlərin də dərs zamanı mobil telefondan istifadə etməsinə icazə verilməyəcək.
Bununla yanaşı, şagirdlərin rəqəmsal imkanlardan düzgün istifadəsi və rəqəmsal asılılığın qarşısının alınması ilə bağlı maarifləndirmə işləri gücləndiriləcək. Ev tapşırıqları və məlumatlandırma zamanı Təhsil Nazirliyinin müəyyən etdiyi rəqəmsal platformalardan kənar vasitələrdən istifadədən də mümkün qədər çəkiniləcək.
Valideynlərə əlavə maliyyə yükü yaradılmayacaq
Nazirliyin pulsuz təqdim etdiyi tədris resurslarından başqa materialların məktəblərdə məcburi istifadəsinə icazə verilməyəcək. Valideynlər müəyyən marka və ya yüksək qiymətli idxal dəftərxana ləvazimatları almağa məcbur edilə bilməyəcək. Bunun əvəzinə yerli istehsal olunan məhsullardan istifadəyə üstünlük veriləcək.
Valideynlərə əlavə maliyyə yükü yaradan tətbiqlərdən də çəkiniləcək, məktəblərdə reklam, tanıtım və kommersiya xarakterli tədbirlərə yol verilməyəcək.
Sınaq imtahanlarına yeni məhdudiyyət
Yeni tədris ilindən məktəblərdə şagirdləri bir-biri ilə yarışdıran və sıralayan, yaxud valideynlər üçün əlavə maliyyə yükü yaradan sınaq imtahanları, ilkin hazırlıq və qiymətləndirmə testləri və digər oxşar imtahanların keçirilməsinə icazə verilməyəcək.
Məhdudiyyət özəl nəşriyyatlar və digər qurumlar tərəfindən hazırlanan bu tip imtahanlara da şamil olunacaq. Nazirliyin qiymətləndirmə siyasətinə uyğun gəlməyən və şagirdlərin akademik, sosial və emosional inkişafına mənfi təsir göstərə biləcək digər imtahan xarakterli tətbiqlər də məktəblərdə keçirilməyəcək.
Xüsusi təhsil ehtiyacı olan şagirdlər üçün dəstək otaqları yaradılacaq
İnklüziv təhsil alan, o cümlədən xüsusi istedadlı şagirdlər də daxil olmaqla xüsusi təhsil ehtiyacı olan uşaqlar üçün təhsil aldıqları məktəblərdə “dəstək otaqları” yaradılacaq. Bu otaqlarda təlim prosesi planlaşdırılacaq, müəllimlər təyin olunacaq və şagirdlərin fərdiləşdirilmiş təhsil proqramları nəzərə alınmaqla dərslərdə fəal iştirakı təmin ediləcək.
Peşə və texniki orta təhsil müəssisələrində isə emalatxana, laboratoriya və müəssisələrdə keçirilən praktiki təlim zamanı əməyin mühafizəsi və təhlükəsizlik qaydalarının tam tətbiqi tələb olunacaq. Praktiki təlim və staj üçün müəssisələr əvvəlcədən uyğunluq baxımından yoxlanılacaq.
Yeni tədris ilində məktəblərdə həyati bacarıqların inkişafına, maliyyə savadlılığına, qənaət mədəniyyətinə, yerli istehsal və istehlak şüurunun formalaşdırılmasına, həmçinin şagirdlərin elm və texnologiyanın istehsalçısına çevrilməsini dəstəkləyən fəaliyyətlərə də yer veriləcək.
