"İmtahan nəticələrini saxtalaşdırıb ailələrini aldadan abituriyentlər var" - XƏBƏRDARLIQ

Təhsil eksperti Elçin Əfəndi son günlər bəzi abituriyentlərin imtahan nəticələrini texnoloji vasitələrlə saxtalaşdıraraq valideynlərini aldatdıqlarını bildirib.

Redaktor.az xəbər verir ki, o, bu barədə özünün feysbuk hesabında yazıb.

Ekspertin sözlərinə görə, son günlər bu cür hallarla dəfələrlə qarşılaşıb:

"Bəzi yeni nəsil uşaqları çox təhlükəlidir. Ardıcıl üç gündür ki, valideynlərini aldadan, ələ salan, yalan danışan uşaqlarla rastlaşıram. İmtahan nəticələrini xüsusi texnoloji alətlərlə dəyişərək eynilə Dövlət İmtahan Mərkəzinin nəticəsinə oxşar formada valideynlərinə təqdim edir və yüksək bal topladıqlarını bildirirlər. Araşdırma zamanı isə məlum olur ki, onlar nəinki yüksək bal toplayıblar, hətta müsabiqə şərtini belə ödəməyiblər".

Elçin Əfəndi qeyd edib ki, bu cür hadisələr əvvəlki illərdə də yaşanıb.

"2019-cu ildə də belə bir fakt olmuşdu. Abituriyent valideynlərinə 596 bal topladığını demişdi. Daha sonra Dövlət İmtahan Mərkəzini günahlandırmağa çalışmışdılar. Araşdırma nəticəsində məlum olmuşdu ki, həmin abituriyent əslində 420 bal toplayıb", – deyə o bildirib.



Ekspert ötən il bölgələrdən birində baş vermiş oxşar hadisəni də xatırladıb.

"Valideyn mənə müraciət etdikdən sonra araşdırma apardım. Məlum oldu ki, qızı 645 bal yox, 445 bal toplayıb. Hətta valideynlərinə Azərbaycan Tibb Universitetinə qəbul olunduğunu deyib. Atası da buna inanaraq qəbul məclisi təşkil edib, xeyli xərc çəkib. Portal qeydiyyatı zamanı isə məlum olub ki, qız heç bir ali məktəbə qəbul olmayıb", – deyə Elçin Əfəndi vurğulayıb.

Təhsil eksperti hesab edir ki, bu cür davranışlar övladların valideynlərdən çəkinməsinin göstəricisidir.

"Bu hərəkətlər onu göstərir ki, övladlarınız sizdən qorxur və buna görə də yalan danışmaqdan belə çəkinmirlər", – deyə o qeyd edib.

Sonda Elçin Əfəndi valideynlərə çağırış edərək bildirib ki, övladlarının dediyi nəticələrlə kifayətlənməsinlər və imtahan ballarını rəsmi mənbələrdən mütləq yoxlasınlar:

"Texnologiyanın bu qədər inkişaf etdiyi, dələduzluq hallarının artdığı dövrdə saxta məlumatlarla rastlaşa bilərsiniz. Övladlarınız sizə nə qədər bal topladıqlarını desələr belə, bunu mütləq yoxlayın ki, sonradan problemlə üzləşməyəsiniz".