Ehtiram Mehtiyev:”Siyasi partiyalar və vətəndaş cəmiyyəti də görməli, müzakirə etməli və öz təkliflərini ortaya qoymalıdır”
Müasir dünyada baş verən mürəkkəb geosiyasi proseslər, regionda genişlənən müharibələr və artan risklər fonunda ölkə daxilində sağlam siyasi mühitin və konstruktiv müxalifətçilik xəttinin mövcudluğu xüsusi önəm kəsb edir. Tənqidin dağıdıcı deyil, dövlətin inkişafına və düzgün qərarların qəbuluna xidmət edən bir alətə çevrilməsi siyasi sistemin yetkinliyinin əsas göstəricisidir.
Tehsilmedia.com xəbər verir ki, bunu Sosdem.az-a açıqlamasında Milli Cəbhə Partiyasının (MCP) başqan müavini, deputat Razi Nurullayevin köməkçisi Ehtiram Mehtiyev ölkədəki siyasi dialog, müxalifətin məsuliyyəti və qlobal risklər qarşısında milli həmrəylik məsələlərini şərh edərkən bildirib.
Başqan müavini müxalifət anlayışına və onun dövlətçilikdəki roluna diqqət çəkib:
“Müxalifət olmaq hakimiyyətin hər dediyini tənqid xatirinə tənqid etmək, hər addımına etiraz xatirinə etiraz etmək demək deyil. Əsl müxalifət dövlətin maraqlarını nəzərə alaraq problemləri vaxtında göstərməyi, fərqli fikir və alternativ yanaşma ortaya qoymağı bacarmalıdır. Tənqid dağıtmaq üçün deyil, daha düzgün qərarların qəbuluna kömək etmək üçün səslənəndə faydalıdır”.
MCP rəsmisi dövlət başçısının qlobal təhlükəsizliklə bağlı xəbərdarlıqlarına toxunaraq, bütün siyasi qüvvələrin məsuliyyət daşıdığını vurğulayıb:
“Bu baxımdan ölkədə sağlam siyasi mühitin olması hər kəs üçün vacibdir. Çünki qarşıdakı təhlükələri və riskləri yalnız dövlət qurumları deyil, siyasi partiyalar və vətəndaş cəmiyyəti də görməli, müzakirə etmeli və öz təkliflərini ortaya qoymalıdır. Prezident İlham Əliyevin çıxışlarında da zaman-zaman gələcək proseslərlə bağlı ciddi mesajlar səslənir. Sentyabrın 17-də TDT-nin təhlükəsizlik üzrə rəhbərləri ilə görüşdə ‘ətrafımızda müharibələr gedir’ və ‘müharibələrin nə sonu, nə də qurtaracağı görünür’ fikirləri də belə mesajlardan biridir. Dünyada proseslər sürətlə dəyişir. Müharibələrin coğrafiyası genişlənir, qarşıdurmalar dərinləşir. Belə bir vəziyyətdə dövlətin yalnız bugünkü problemlərə deyil, sabah yarana biləcək risklərə də hazır olması vacibdir”.
Deputat köməkçisi çıxışında siyasi dialoqun və məsuliyyətli müxalifətçiliyin vacibliyini qeyd edərək fikirlərini yekunlaşdırıb:
“Bunun üçün isə təkcə dövlət strukturlarının fəaliyyəti kifayət deyil. Güclü siyasi institutlar, real siyasi dialoq, sağlam tənqid və alternativ fikirlər də lazımdır. Məncə, bu gün əsas məsələ kimin hakimiyyətdə, kimin müxalifətdə olmasından daha çox, ölkənin qarşıdakı mürəkkəb dövrə nə qədər hazırlıqlı olmasıdır. Müxalifətin də öz məsuliyyəti var: susmamaq, ama məsuliyyətsiz danışmamaq; tənqid etmək, ama dövlət maraqlarını da unutmamaq”.
