Respublika Fənn Olimpiadalarında suallarla bağlı problemlər yaşanıb - Uşaqların, müəllimlərin əsəbini pozurlar...

Respublika Fənn Olimpiadalarında suallarla bağlı problemlər yaşanıb
Dekabrın 22-də Respublika Fənn Olimpiadalarının ilk mərhələsi baş tutub. Həmişə olduğu kimi, şagirdlər 8 istiqamətdə qüvvəsini sınayıb. Rayon (şəhər) mərhələsinin nəticələrinin yanvarın 9-da açıqlanacağı bildirilir. Amma indidən narazılıq səsləri ucalır. Ayrı-ayrı müəllimlər sualların düzgün tərtib olunmadığını iddia edir.

Bizimyol.info xəbər verir ki, Xankəndi, Şuşa və Xocalıda ilk dəfə olaraq Respublika Fənn Olimpiadalarının rayon (şəhər) mərhələsi təşkil olunub. Təhsil funksionerləri bu barədə sosial platformalarda çoxlu paylaşım ediblər, məsələdən fəxrlə danışıblar. Lakin problemlərə reaksiya yoxdur. Suallarla bağlı iradlar nəzərə alınmır.

Tarix müəllimi Kamran Şeyxzamanlı yazır ki, 6-7 ildir olimpiadalardakı problemləri işıqlandırır, qeyri-peşəkar yanaşmadan danışır, amma hər hansı reaksiya görməyib. Onun Təhsil İnstitutunun direkor müavini Fuad Qarayevə müraciətləri də cavabsız qalıb.

“Səhv suallar, qüvvədə olmayan dərsliklərdən suallar olur. Texniki fənlərə olan diqqət humanitar sahəyə yoxdur. Əzbərçi, bezdirici, mənasız suallarla uşaqların, müəllimlərin əsəbini pozurlar. Bir sözlə, yola verirlər. Salınan suallar günümüzlə uzlaşmayan, heç kimə lazım olmayan suallardır. Sualların formatı bir kənara, məktəbdə istifadə edilməyən dərsliklərdən suallar var. Adamlar köhnə bazadan sual salırlar. Özlərinə güc verib yenisini yazmırlar. Bu sual salan elə başa düşür ki, kitabın küncündən, mənbədən, xəritə içindən, aforizmlərdən sual salmaq çətin sual deməkdir. Bu, uşaqların əziyyətlərini yerə vurmağa, həvəsdən salmağa heç kimin haqqı yoxdur”.

Başqa bir tarix müəllimi Ceyhun Həsənov yazıb ki, şagirdlərinə daha Respublika Fənn Olimpiadalarına qoşulmamağı tövsiyə edib: “Demişəm ki, gedib özünüzün də, mənim də əsəblərimi korlamayın”.

Yevlaxda yaşayan Nazlı Məmmədova oğlunu olimpiadaya göndərdiyini bildirir. Amma bundan peşman olub: “Kaş göndərməzdim...”

Murad Əliyev işə məsuliyyətsiz yanaşıldığını yazıb: “Müəllimi, şagirdi dolayıblar... Kiçik summativ qiymətləndirmə materiallarını tərtib edərkən ayırdığım vaxtın, enerjinin heç onda birini bunlar olimpiadaya sərf etmirlər”.

Müəllim kimi fəaliyyət göstərən Aysel Məmmədova Respublika Fənn Olimpiadalarının obyektiv şəraitdə keçirilməsinə şübhə ilə yanaşır. Onun yazdığına görə, Dövlət İmtahan Mərkəzinin imtahanında 30 sualdan 29-na düzgün cavab verən şagird keçən olimpiadada növbəti mərhələyə keçməyib. Müəllim hesab edir ki, belə nəticə qeydə alına bilməzdi.

Ümumiyyətlə, obyektivliklə bağlı şübhələr çoxdur. Bu haqda xeyli rəy diqqət çəkir. Hələlik yazılanlara rəsmi səviyyədə hər hansı reaksiya gözə dəymir.