AzTU komandası “Game Summit 2026”nın QALİBİ olub

Azərbaycan Texniki Universitetində (AzTU) “Game Summit 2026” tədbiri keçirilib.

Aztəhsil.az xəbər verir ki, AzTU İnkubasiya Mərkəzi, Tələbə Həmkarlar İttifaqı Komitəsi, “Holberton School Azerbaijan” və “Startup Azerbaijan”ın tərəfdaşlığı ilə keçirilən tədbirin əsas məqsədi oyun texnologiyalarına maraq göstərən gəncləri bir araya gətirmək, onların innovativ düşüncə və bacarıqlarını inkişaf etdirmək, komanda işini təşviq etmək və iştirakçılar üçün real texnoloji mühit formalaşdırmaq olub.

Yarışda AzTU ilə yanaşı, Bakı Dövlət Universiteti (BDU), Azərbaycan Dövlət İqtisad Universiteti (UNEC), Bakı Ali Neft Məktəbi (BANM), ADA Universiteti, Türkiyə-Azərbaycan Universiteti (TAU), Bakı Mühəndislik Universiteti (BMU), UFAZ – Azərbaycan-Fransız Universiteti, Azərbaycan Dövlət Dəniz Akademiyası və Odlar Yurdu Universitetinin tələbələri iştirak edib.

İki gün davam edən müsabiqə çərçivəsində iştirakçılar müxtəlif oyun layihələri üzərində çalışıb, ideyalarının prototipini hazırlayıb, mentor dəstəyi və texniki sessiyalar vasitəsilə bilik və bacarıqlarını təkmilləşdiriblər.

Sonda komandalar hazırladıqları oyun layihələrini münsiflər heyəti qarşısında təqdim edib. Qiymətləndirmənin nəticələrinə əsasən, AzTU-nun “Penguins of Madagascar” komandası birinci, Odlar Yurdu Universitetinin “MegaMorph” komandası ikinci, UNEC-in “ZUUGZWANG” komandası isə üçüncü yerə layiq görülüb.

Münsiflərin rəyi əsasında həvəsləndirici yer BDU-nun “Quadra” komandasına təqdim edilib.

Qalib komandalara diplom və “Holberton School Azerbaijan”ın xüsusi mükafatları təqdim olunub.

Birinci yerin qalibinə “Full Stack” kurs paketi, iki və üçüncü yerin qaliblərinə isə “Computer Science” kurs paketləri təqdim edilib.

Həvəsləndirici yerə layiq görülən komanda isə AzTU Tələbə Həmkarlar İttifaqı Komitəsinin xüsusi hədiyyəsi ilə mükafatlandırılıb.

Digər iştirakçılara isə sertifikat təqdim olunub.