130 mindən çox abituriyent qeydiyyatdan keçib - rəqabətli ixtisas qrupu DƏYİŞDİ
Ali təhsil müəssisələrinə qəbul imtahanının 2-ci mərhələsinin 1-ci cəhdində iştirak etmək istəyən abituriyentlərin qeydiyyat prosesi davam edir.
AzEdu.az-ın Dövlət İmtahan Mərkəzi-ndən əldə etdiyi məlumata əsasən, 15:00-a olan vəziyyətə görə ali təhsilin bakalavriat səviyyəsi və orta ixtisas təhsili pilləsinə (tam orta təhsil bazasında) qəbul üçün qeydiyyatdan keçən abituriyentlərin ümumi sayı 133 731 nəfər təşkil edir.
Məlumata görə, ali təhsil müəssisələrinə (Ali TM) müraciət edənlərin sayı 130 037 nəfər olub. Onlardan 120 943 nəfər Azərbaycan bölməsi, 12 788 nəfər isə rus bölməsi üzrə qeydiyyatdan keçib. Orta ixtisas təhsili (kollec) üzrə isə ümumilikdə 120 590 nəfər müraciət edib (Azərbaycan bölməsi - 110 542, rus bölməsi - 10 048).
İxtisas qrupları üzrə I cəhd test imtahanına qeydiyyat göstəricilərinə gəlincə, ən çox müraciət I ixtisas qrupuna qeydə alınıb - 10 206 nəfər (8875 AZ, 1331 RU). II qrup üzrə 7773 nəfər, III qrup üzrə 6389 nəfər, IV qrup üzrə isə 2112 nəfər imtahanda iştirak edəcək. Ümumilikdə I-IV ixtisas qrupları üzrə qeydiyyatdan keçənlərin sayı 26 480 nəfərdir.
“Ana dili (dövlət dili kimi)” fənni üzrə test imtahanında iştirak edəcək abituriyentlərin sayı 11 547 nəfər təşkil edir. Onlardan 10 811 nəfər buraxılış imtahanı çərçivəsində, 736 nəfər isə qəbul imtahanının I cəhdi çərçivəsində bu fəndən imtahan verəcək. Bundan əlavə, ötən ildə bu fənn üzrə “məqbul” nəticə əldə etdiyi üçün cari ildə imtahansız müsabiqəyə buraxılanların sayı 1196 nəfərdir.
Həmçinin qeyd olunur ki, 2025-ci il buraxılış və ya test imtahanlarının I mərhələsinin nəticələrinə əsasən müsabiqəyə qoşulan abituriyentlərin sayı 3008 nəfər təşkil edir.
Qeyd edək ki, I, II, III və IV ixtisas qrupları üzrə qəbul imtahanının 2-ci mərhələsinin 1-ci cəhdində iştirak etmək istəyən abituriyentlər 29 aprel saat 23:59-dək şəxsi kabinetinin istifadəçi adı və parolundan istifadə etməklə DİM-in müvafiq internet səhifəsinə (//eservices.dim.gov.az/erizebak/cehd1/) daxil olaraq imtahan vermək istədikləri ixtisas qrupunu seçib qeydiyyatdan keçməlidirlər.
