BMU Pekin Kimya Texnologiya Universiteti ilə əməkdaşlığını genişləndirir
Bakı Mühəndislik Universiteti (BMU) ilə Çin Xalq Respublikasının Pekin Kimya Texnologiya Universiteti (Beijing University of Chemical Technology-BUCT) arasında mövcud əməkdaşlığın daha da genişləndirilməsi imkanları müzakirə olunub.
BMU-dan bildirilib ki, görüş zamanı tərəflər iki ali təhsil müəssisəsi arasında hazırda icra olunan ikili diplom proqramının uğurla davam etdiyini vurğulayaraq, bu əməkdaşlığın yeni istiqamətlər üzrə inkişafının vacibliyini bildiriblər. Xüsusilə təhsil, elmi-tədqiqat, akademik mübadilə, birgə layihələr və beynəlxalq proqramlar çərçivəsində əməkdaşlığın gücləndirilməsi məsələləri diqqət mərkəzində olub.
BMU-nun beynəlxalq əlaqələr üzrə prorektoru Ətrabə Gül qeyd edib ki, qurulan əməkdaşlıq hər iki universitetin tələbə və müəllimləri üçün yeni akademik və elmi imkanlar yaradır, eyni zamanda, ali məktəbin beynəlxalq nüfuzunun artmasına töhfə verir. Tərəflər arasında mübadilə, eləcə də akademik və elmi-tədqiqat layihələrinin icrasının gələcək əməkdaşlığın əsas istiqamətləri kimi nəzərdə tutulduğunu deyən prorektor bu cür əməkdaşlıqların iki ölkənin təhsil və elm sahəsində əlaqələrinin inkişafına müsbət təsir göstərdiyini vurğulayıb.
Görüşdə, həmçinin gələcəkdə birgə seminarlar, konfranslar, təlim proqramlarının təşkili, yeni akademik istiqamətlərin institusional çərçivədə formalaşdırılması və bu sahədə beynəlxalq təcrübənin tətbiqi məsələləri ətrafında fikir mübadiləsi aparılıb.
Qeyd edək ki, ötən ildən BMU ilə BUCT arasında bakalavriat səviyyəsində kimya, kompüter, mexanika mühəndisliyi ixtisaslarına dair ikili diplom proqramının icrasına start verilib. Bu ilin yanvar ayında isə iki universitet arasında daha 3 ixtisas - kimya, biotexnologiya, biznesin idarəedilməsi üzrə ikili diplom proqramının həyata keçirilməsinə dair müqavilə imzalanıb.
