Bir günlük nağıl: Sinifdə yeni il möcüzəsi
Yeni ilin sehrli nəfəsi məktəbin divarları arasında dolaşırdı. Rəngarəng işıqlar, uşaq gülüşləri və nağıl musiqiləri bir anın içində sinfi başqa bir aləmə çevirmişdi. Həmin gün uşaqlar sadəcə dərsə deyil, xəyalın, sevincin və möcüzənin hökm sürdüyü bir dünyaya daxil oldular.
Animatorların gəlişi ilə Yeni il şənliyi əsl bayrama çevrildi. Uşaqlar nağıl qəhrəmanları ilə birgə oynadı, güldü, arzular tutdu. Şaxta baba isə yalnız hədiyyə paylayan bir obraz deyildi – o, uşaqların saf inancını, təmiz duyğularını qoruyan bir ümid rəmzi idi. O balaca ürəklərdə “möcüzə mümkündür” hissini yaşatdı, uşaqların gözlərində parlayan işıq isə hər şeyi deyirdi.
Bu nağılvari günün memarı müəllim Saadət Adnalıyeva oldu. O, 1 “a” sinfinin balaca şagirdlərinə yalnız Yeni il şənliyi deyil, illər sonra belə xatırlanacaq bir xatirə bəxş etdi. Çünki bəzən müəllimlik təkcə öyrətmək deyil, uşağın dünyasını gözəlləşdirmək, onun qəlbində inamı və saf duyğuları qoruyub saxlamaqdır.
Və həmin gün… uşaqlar bir günlüyə də olsa, nağılın içində yaşadılar.
