BDU rektoru Masallı gəncləri ilə görüşüb - FOTO

Bakı Dövlət Universitetinin (BDU) rektoru Elçin Babayev Masallı rayon Tarix-diyarşünaslıq muzeyində rayon gəncləri ilə görüşüb.

tehsilmedia.info xəbər verir ki, gənclərin arzu-istəkləri, təhsilləri ilə maraqlanan rektor onları dövlətimizin maraqlarını qorumaq və ölkəmizin daha da qüdrətlənməsi üçün fəal olmağa çağırıb.

Rektor qeyd edib ki, Azərbaycan gənclərinin Vətənə sədaqət ruhunda tərbiyə edilməsi məsələsi Ulu Öndər Heydər Əliyevin azərbaycançılıq ideologiyasının mühüm istiqamətlərindən biri olub. Ümummilli Lider hakimiyyətdə olduğu illərdə gənclərin inkişafına, təhsilinə böyük qayğı ilə yanaşıb: "Ulu Öndər ölkəmizi yüksəkixtisaslı kadrlarla təmin etmək üçün minlərlə gənci keçmiş SSRİ-nin ən nüfuzlu ali məktəblərinə göndərirdi. Həmin gənclər indi müstəqil dövlətimizin güclənməsi üçün çalışırlar".

Elçin Babayev bildirib ki, dövlət gənclər siyasəti Azərbaycan Respublikasının Prezidenti İlham Əliyevin rəhbərliyi ilə yeni mərhələdə daha da inkişaf etdirilib. Həyata keçirilən məqsədyönlü siyasətin nəticəsi olaraq bu gün Azərbaycanda yüksək intellektual səviyyəyə, vətənpərvərlik hissinə, milli düşüncəyə, dövlətçilik məfkurəsinə, yüksək ideyalara malik gənclər formalaşıb. Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində tarixi Zəfərimiz gənclərimizin torpaq, Vətən sevgilərini bir daha nümayiş etdirdi.

Rektor gənclərə BDU-nun fəaliyyəti, son illər aparılan islahatlar haqqında da məlumat verib, onların suallarını cavablandırıb.