Kənan Kərimzadə: Təhsil islahatlarının mərkəzində Azərbaycan müəllimi dayanır

“Məqsədyönlü və məntiqli şəkildə icra olunan islahatlar Azərbaycan təhsilini yeni və yüksək transformasiya mərhələsinə hazırlayıb”.

Bu fikirləri elm və təhsil nazirinin müavini Kənan Kərimzadə bu gün keçirilən “Keyfiyyətin yüksəldilməsi: Təcrübələr və yeni yanaşmalar” adlı elmi-praktik beynəlxalq konfransın açılışında səsləndirib.

Nazir müavininin sözlərinə görə, bu gün təhsil sahəsində aparılan dəyişikliklərin nəticələri artıq yalnız sənəd və strategiyalarda deyil, məktəblərdə, sinif otaqlarında və insanların real həyatında müşahidə olunur.

Kənan Kərimzadə bildirib ki, həyata keçirilən islahatların mərkəzində Azərbaycan müəllimi dayanır. “Həm beynəlxalq platformalarda, həm də nazirlik tərəfindən dəfələrlə vurğulanıb ki, hər bir təhsil sisteminin gücü onun müəllimindən başlayır. Heç bir təhsil sisteminin keyfiyyəti müəllimin keyfiyyətindən yüksək ola bilməz”, – deyə o qeyd edib.

Nazir müavini çıxış zamanı müəllimlik peşəsinin məsuliyyət və cəmiyyət tərəfindən xüsusi diqqət tələb etdiyini də vurğulayıb.

Onun sözlərinə görə, həyatın müxtəlif sahələrində ən çətin üç qrup var: valideynlər, dövlət məmurları və müəllimlər. “Valideynləri hər kəs başa düşməyə çalışır, dövlət məmurları sosial şəbəkələrdə ən çox müzakirə edilən qrupdur, müəllimləri isə hamı imtahan etmək, yoxlamaq və monitorinq aparmaq istəyir”, – deyə Kənan Kərimzadə əlavə edib.