Devid Qodfrey: Təhsil innovasiyaları düşündüyümüz qədər riskli deyil
“Ənənəvi sistem fərdi öyrənməyə fokuslanır. Yeni yanaşmada isə komandalar və şəbəkələrin öyrənməsi vacibdir. Ənənəvi yanaşma təşkilati sabitliyə əsaslanır, halbuki yeni dövrdə dəyişikliklərlə yanaşı, davamlılıq da vacibdir”.
Bu fikirləri London Universitet Kollecinin təhsil liderliyi və idarəedilməsi üzrə dosenti Devid Qodfrey bu gün keçirilən “Ümumi təhsildə keyfiyyətin yüksəldilməsi: Təcrübələr və yeni yanaşmalar” adlı elmi-praktik beynəlxalq konfransda məruzə ilə çıxış edərkən səsləndirib.
O qeyd edib ki, əvvəllər uğursuzluqdan qorxulurdu, risk edilmirdi. İndi isə təhsil innovasiyalarının əslində düşündüyümüz qədər riskli olmadığı başa düşülür:
“Ənənəvi planlaşdırma qısamüddətli hədəflərə yönəlib. İndi təşkilati yenilənmə və davamlı inkişaf əsas hədəfdir. Bu yanaşma dəyişiklikləri sadəcə proses deyil, həm də mədəniyyət dəyişikliyidir. Necə işlədiyimizə dair fundamental fərqdir. Ənənəvi yanaşmada bilik ekspertlərin beynindədir və yuxarıdan aşağıya ötürülür. Halbuki bilik iqtisadiyyatında bilik paylaşılır və şəbəkə daxilində yayılır. Bilik həmişə rəsmi vəzifələrə görə paylanmır”.
