Beynəlxalq sorğuda Azərbaycan üzrə 4 minədək təhsil işçisi iştirak edəcək

TALIS 2024-ün (Öyrətmə və Öyrənmə üzrə Beynəlxalq Sorğu) əsas mərhələsinin təşkilinə başlanılıb.

Elm və Təhsil Nazirliyindən "tehsilmedia.info"a bildirilib ki, sorğunun 2024-cü ilin fevral ayında keçirilməsi nəzərdə tutulub.

Ötən il sınaq mərhələsi həyata keçirilmiş sorğunun əsas mərhələsində Azərbaycan üzrə 222 ümumi təhsil müəssisəsindən 4 minə yaxın müəllim və müəssisə direktorlarının iştirakı planlaşdırılıb.

Beynəlxalq sorğu 55-ə yaxın ölkədə keçirilməklə müəllim və məktəb direktorlarının peşəkar inkişafı, eləcə də onların təhsilə dair yanaşmalarını anlamaq, iş, tədris təcrübələrinin qiymətləndirilməsi kimi məsələləri tədqiq etmək məqsədilə təşkil olunur. TALIS İqtisadi İnkişaf və Əməkdaşlıq Təşkilatı ilə Təhsil Nailiyyətlərinin Qiymətləndirilməsi üzrə Beynəlxalq Assosiasiya tərəfindən 5 ildən bir keçirilir.

Qeyd edək ki, Azərbaycan TALIS sorğusunda ilk dəfə iştirak edir.