XVl qurultay təhsilə böyük töhfə verəcək
Xəbər verdiyimiz kimi, dekabrın 15-də Bakı Konqres Mərkəzində Azərbaycan müəllimlərinin növbəti-XVI qurultayı keçiriləcək. Qurultayda dövlət rəsmiləri və hökumət nümayəndələri, millət vəkilləri, tanınmış ziyalılar, media qurumlarının rəhbərləri, təhsil işçiləri və digər qonaqlar iştirak edəcəklər. Qurultayda ümumilikdə 1700-ə yaxın nümayəndənin iştirakı nəzərdə tutulub.
Prezident İlham Əliyevin Sərəncamı ilə təsdiq edilmiş “Təhsilin inkişafı üzrə Dövlət Strategiyası”nda müəyyənləşdirilmiş hədəflərə nail olunması istiqamətində əldə edilmiş əhəmiyyətli nailiyyətlər, eləcə də 2018-ci ilin noyabrında keçirilmiş Azərbaycan müəllimlərinin XV qurultayından sonrakı müddət ərzində təhsil sistemində həyata keçirilmiş tədbirlər və islahatlar barədə Azərbaycan ictimaiyyəti məlumatlanacaq.
tehsilmedia.info xəbər verir ki, 2018-ci ildə keçirilən Azərbaycan müəllimlərinin XV qurultayında iştirak edən Şabran rayonu Hacı Əliyev adına Dağ Bilici kənd tam orta məktəbin həm direktoru həm də coğrafiya müəllimi Sirac Orucov təəssüratlarını AzEdu.az-a bölüşüb.
Qeyd edib ki, XV qurultay Azərbaycan müəllimlərin birlikdə toplandığı nadir və yüksək səviyyəli tədbirlərdən biri idi:
“İştirak etdiyim heç bir tədbir, bundan yaxşı ola bilməz. Düşünürəm ki, bu qurultayda ölkə təhsilinin peşəkar nümayəndələri ilə ünsiyyətdə olmaq çox qürurverici və inkişafetdirici oldu. Ona görə də təhsil karyeramda həmin qurultay əhəmiyyətli bir yer tutur. Sözügedən qurultayda özümü inkişaf etdirəcək məqamlar kifayət qədər idi.
Hesab edirəm ki, XV qurultaydan bu günə qədər təhsil sahəsində müsbət addımlar atılır. Məsələn, orada məktəbəqədər təhsilin ölkə daxilində şaxələndirilməsi nəzərdə tutulmuşdu və orta məktəblərin daxilində məktəbəhazırlıq qruplar şəbəkəsinin genişləndirilməsi məsələsi müzakirə olunmuşdu. Bu məsələnin icrası öz əksini tapdı”.
Müsahibimiz bildirib ki, yeni qurultay Azərbaycan təhsilinə faydalı olacaq:
“Azərbaycanda hər 5 ildən bir müəllimlərin qurultayı keçirilir. Bu da öz növbəsində təhsilin inkişafı üçün çox əhəmiyyətli bir addımdır. Çünki təhsil sistemində təhsil işçilərinin toplandığı ən mühüm və yüksək səviyyəli tədbir Azərbaycan müəllimlərinin qurultayıdır.
XVI qurultayda Azərbaycan təhsilinin inkişafında əhəmiyyətli məsələlər gündəmə gətirələcək. Bütün qurultay iştirakçılarına uğurlar arzulayıram. Ümid edirəm ki, növbəti 5 illik üçün təhsilimizin inkişafı yönümdə vacib qərarlar qəbul olunacaq”.
Qeyd edək ki, Azərbaycan müəllimlərinin ilk qurultayı 1906-cı ildə keçirilib.
