Deputat: Qarabağ Universitetinin filialları yaradıla bilər
Elm və Təhsil Nazirliyindən Qarabağ Universitetinin bərpasından sonra, burada ilkin mərhələdə 24 ixtisasın tədris olunacağı ilə bağlı məlumat verilib.
Nazir Emin Əmrullayev söyləyib ki, növbəti mərhələdə ixtisas seçimlərini sayı artırılacaq.
Maraqlıdır, Qarabağ universitetində yeni ixtisasların formalaşması mümkündür?
tehsilmedia.info xəbər verir ki, bu barədə AzEdu.az-a açıqlama verən Milli Məclisin deputatı Kamilə Əliyeva qeyd edib ki, Qarabağ və Şərqi-Zəngəzurda Böyük Qayıdış konsepsiyasına uyğun olaraq şəhər və kəndlər yenidən qurulur eyni zamanda bu sahədə böyük infrastruktur layihələr həyata keçirilir:
“Köçkün düşən insanlar artıq öz yurd-yuvalarına qayıdırlar. Həmin insanların məşğulluq və təhsil sahəsi ilə bağlı geniş miqyaslı işlər görülür. Yeni müəssisələr, xəstəxanalar və məktəblər inşa edilir. Bütün aparılan işlər baş plana uyğun olaraq həyata keçirilir. Cənab Prezident İlham Əliyev görülən bütün işlərə şəxsən özü nəzarət edir. İşğaldan azad edilimiş ərazilərdə ən müasir tələblərə uyğun orta ümumtəhsil məktəblər tikilib. Köçürülən sakinlərimizin arasında uşaqlar və yeniyetmələrin sayı çoxluq təşkil edir. Həmin gənclərin orta məktəbi bitirdikdən sonra ali təhsil almaq üçün Qarabağda universitetin açılması zəruri idi. Prezident Cənab İlham Əliyevin Xankəndi şəhərində Qarabağ Universtetinin açılması ilə bağlı sərəncam imzalaması müdrik bir addım oldu. Qarabağdan olan məzunlar evlərindən uzaq olmadan ali təhsil alıb və gələcəkdə də burada işlə təmin olunacaqlar. Digər rayonlardan da Qarabağ Universitetində təhsil almaq üçün hər cür şərait yaradılacaq”.
Deputat vurğulayıb ki, Qarabağ Universitetində Biologiya fakültəsinin açılması zəruridir:
“Universitetdə daimi çalışan müəllimlərlə yanaşı, Bakı universitetlərdən də professor və müəllim heyətidə mütəmadi olaraq mühazirələr oxuyacaqlar. İlkin olaraq Qarabağ universitetində 20-dən çox ixtisas tədris olunacaq. Zaman keçdikcə tələb olunacaq ixtisasların sayında artım olacaq. Xankəndi və ətraf rayonlarda digər universitetlərin filialları açıla bilər. Qarabağ və Şərqi-Zəngəzur zəngin flora və faunaya malikdir. Xüsusilə də Kəlbəcər şəhəri təbii dərman bitkiləri ilə qədimdən böyük şöhrət qazanıb. Flora və faunanı yenidən dirçəltmək üçün Qarabağ Universitetində Biologiya fakültəsinin açılması zəruridir. Qarabağ Universiteti dünya təhsil sistemində layiqli yer tutması üçün hər bir insan çalışmalıdır”, – deyə fikrini yekunlaşdırıb.
