Ali məktəbə qəbul imtahanları asanlaşmalıdır!

Ali təhsil müəssisələrinə hazırlaşan namizədlər biliklərini yoxlamaq üçün müxtəlif sınaq imtahanlarında iştirak edirlər. Belə ki, müxtəlif hazırlıq kursları hər ay, Dövlət İmtahan Mərkəzi (DİM) isə mütəmadi olaraq abituriyentlər üçün sınaq imtahanı təşkil edir.

Lakin müşahidələr onu göstərir ki, abituriyentlərin sınaq imtahanında topladığı bal ilə qəbul imtahanlarında yığdıqları nəticə üst-üstə düşmür.

tehsilmedia.info xəbər verir ki, mövzu ilə bağlı AzEdu.az-a açıqlama verən təhsil eksperti Ramin Nurəliyev bildirib ki, bəzi təkmilləşdirilmiş kursların sınaq imtahanları Dövlət İmtahan Mərkəzi tərəfindən keçirilən sınaq imtahanları ilə eyni səviyyədədir:

“Hazırlıq kurslarının çoxu sınaq imtahanlarını Dövlət İmtahan Mərkəzi tərəfindən keçirilən imtahanlara uyğunlaşdırmağa çalışsa da buna nail ola bilmirlər. Hətta bəzi kurslar abituriyentlər həvəsdən düşüb, valideynləri tərəfindən təzyiqə məruz qalmasın deyə sualları bir qədər asan tərtib edir”.

Ekspert qeyd edib ki, abituriyentlərin 1-ci və 2-ci sınaqda topladığı bal qəbul imtahanında topladığı bala çox yaxın olur:

“Bir neçə kurs var ki, sınaq imtahanını keyfiyyətli şəkildə keçirir. Həmin kursların tərtib etdiyi sınaq imtahanları qəbul imtahanlarına hədsiz dərəcədə yaxın olur. Uzun müddət kurslarda idarəçi olaraq işləmişəm.Təcrübəmdən çıxış edərək qeyd edə bilərəm ki, abituriyentlərin daha çox 1- ci və 2-ci sınaq imtahanında topladığı bal ümumi qəbul imtahanının balına çox yaxın olur”.

Həmsöhbətimiz son olaraq təklif edib ki, DİM imtahan suallarını asanlaşdırmalıdır:

“Abituriyentlər dekabr ayının sonundan fevral ayınadək ciddi şəkildə passivləşirlər. Bəs bunun əsas səbəbi nədir? Çünki bu zamana qədər həm məktəb, həm hazırlıq dərsləri ilə beyinlərini yorurlar. Tutaq ki, abituriyent sentyabr-oktyabr ayında keçirilən sınaq imtahanında hər hansı bir axsaqlıq meydana gətirib, az bal toplayıbsa, bu zəiflik özünü dekabr ayında büruzə verəcək.

Müəllimlər də buraxılış imtahanı mart-aprel aylarında olduğuna görə çalışırlar ki, yanvara qədər proqramı keçib bitirsinlər və yanvardan sonra 2-ci dəfə təkrar etməyə başlasınlar. Bu 2-ci dəfəki təkrar nəticəsində də abituriyent özündə güc toplayıb, çalışmağa başlayır. Beləcə də müəyyən qədər öz nəticələrini düzəltmiş olurlar.

Düşünürəm ki, mütləq şəkildə qəbul imtahanları asanlaşdırılmalıdır. Abituriyentlərin balı aşağı düşdükcə, universitetlərə keçid balları da aşağı enir. Sonra da icitimaiyyətdə 150-200 balla ali məktəbə qəbul olunanlar ciddi şəkildə qınanır. Təklif edirəm ki, DİM sualları asanlaşdırsın. Bu öz növbəsində abituriyentlərin balına təsir göstərəcək. Onlar 150-200 deyil, 300-400 balla ali məktəbə qəbul olacaqlar”.