Türkiyənin Ege Universitetinin professoru BDU-nun Fizika fakültəsində mühazirə deyib - FOTO
Bakı Dövlət Universitetində (BDU) Ümummilli Lider Heydər Əliyevin 100 illik yubileyinə həsr olunmuş Elm festivalı çərçivəsində ustad mühazirələri davam edir.
Bu barədə "tehsilmedia.info"a BDU-dan məlumat verilib.
Bildirilib ki, Türkiyənin Ege Universitetinin Fizika kafedrasının müdiri professor Mustafa Tepe BDU-nun Fizika fakültəsində “İfratkeçiricilik və YBCO əsasında nazik təbəqələrin sensor tətbiqləri” mövzusunda çıxış edib.
Professor M.Tepe əvvəlcə aşağı temperaturlu ifratkeçiricilər, onların kəşfi və müxtəlif sahələrdə tətbiqindən danışıb. O, Meyesner effekti və ifratkeçiricilərin faza diaqramı haqqında maraqlı məlumatlar təqdim edib, ittirium və bismut əsaslı yuxarı temperaturlu ifratkeçiricilərin sintezi, onlar əsasında nazik təbəqələrin alınmasından bəhs edib. Türkiyəli professor belə nazik təbəqələrin əsasən sensor qismində müxtəlif yüksək həssaslı tibbi cihazlarda tətbiq olunduğu, eləcə də ifratkeçiricilərin sintezi və tətbiqi sahəsindəki yeni nailiyyətlər barədə məlumat verib, iştirakçıların suallarını cavablandırıb.
Sonra Mustafa Tepe Ege Universitetində tədrisin və elmi tədqiqatların təşkili, ali məktəbin əldə etdiyi nailiyyətlər barədə danışıb.
BDU-nun Fizika fakültəsi ilə Ege Universitetinin Fizika kafedrası arasında tədris və elmi tədqiqatlar sahəsində birgə əməkdaşlıq məsələləri müzakirə olunub.
