“Nizami Gəncəvi almanaxı”nın dördüncü cildi çap olunub
Azərbaycan Milli Elmlər Akademiyası (AMEA) Nizami Gəncəvi adına Ədəbiyyat İnstitutu tərəfindən “Nizami Gəncəvi almanaxı”nın dördüncü cildi “Elm və təhsil” nəşriyyatında işıq üzü görüb.
İnstitutdan "tehsilmedia.info"a bildirilib ki, almanax müasir Azərbaycan dövlətinin qurucusu, görkəmli siyasi xadim Heydər Əliyevin 100 illik yubileyinə həsr olunub. Ədəbiyyat İnstitutunun Elmi şurasının 2023-cü il 30 mart tarixli qərarı ilə çap olunan almanaxda Nizamişünaslıq şöbəsinin əməkdaşlarının və digər alimlərin araşdırmaları yer alıb.
Layihənin elmi rəhbəri AMEA-nın prezidenti akademik İsa Həbibbəyli, elmi redaktoru AMEA-nın müxbir üzvü Nüşabə Araslı, məsul redaktorları filologiya üzrə fəlsəfə doktorları Zəhra Allahverdiyeva, Aygün Bağırlı və Yelena Teyerdir. Koordinatorları Samirə Əliyeva və Lalə Paşayevadır.
Dördüncü cild akademik İsa Həbibbəylinin “Nizami Gəncəvi ədəbi irsi: Heydər Əliyevdən – İlham Əliyevə” başlıqlı yazısı ilə açılır. Nəşrdə ümumilikdə 16 tədqiqatçının mövzu ilə bağlı məqalələri yer alıb. Nəşri Nizami Gəncəvinin dövrü, həyatı və ədəbi irsinə yeni baxış, daha obyektiv elmi meyarlar əsasında yazılmış elmi məqalələr əhatə edir.
Qeyd edək ki, Nizami Gəncəvi haqqında almanaxlarının nəşr ənənəsi 1940-cı ildən başlanıb.
