Şagirdlərin süni intellekt alətlərindən istifadəsinə QADAĞA QOYULDU

Nyu-York şəhəri süni intellektlə bağlı məktəb siyasətində yenilik edir.

Tehsilmedia.com xəbər verir ki, yeni qaydalar 8-ci sinfə qədər şagirdlərin süni intellekt alətlərindən istifadəsini qadağan edir.

Qaydalara əsasən, ölkənin ən böyük məktəb sistemində təhsil alan, erkən uşaqlıq proqramlarının, ibtidai, eləcə də orta məktəblərin şagirdləri çatbotlar və süni intellekt əsaslı repetitorlar da daxil olmaqla generativ süni intellekt alətlərindən istifadə edə bilməyəcəklər.
Qaydalar məktəblərə məktəbəqədər hazırlıqdan ikinci sinfə qədər olan şagirdlərə fərdi cihazlar təqdim etməyi qadağan edir. Bununla belə, siniflərdə interaktiv smart lövhələrdən istifadəyə icazə veriləcək. 3-5-ci siniflər üçün ekran qarşısında keçirilən vaxtın 30 dəqiqə, orta məktəb şagirdləri üçün isə 45 dəqiqə ilə məhdudlaşdırılması tövsiyə olunur.

Təqdimata əsasən, müəllimlər dərs planlarının hazırlanması, tərcümə və müxtəlif yazışmaların hazırlanması kimi tədris məqsədləri üçün təsdiqlənmiş süni intellekt alətlərindən istifadə edə biləcəklər. Lakin onlara bu texnologiyadan qiymətləndirmə, şagirdlərin davranışlarının monitorinqi, məsləhət xidməti və xüsusi təhsil planlarının hazırlanması üçün istifadə etməyə icazə verilməyəcək.