23 min tələbə məzun ola bilməyib - Onların neçəsi yüksək bal toplamışdı?

2016-2019-cu illərdə ali təhsil müəssisələrinə qəbul olaraq tələbə adını qazanan abituriyentlərin 15,91 faizi bakalavriat səviyyəsini normativ təhsil müddətində başa vura bilməyib.

Tehsilmedia.com xəbər verir ki, bu barədə Dövlət İmtahan Mərkəzinin (DİM) “Abituriyent” jurnalının 12-ci sayında məlumat verilib.

Araşdırmaya əsasən, həmin illərdə ali təhsil müəssisələrinə qəbul olunan 23 923 nəfər normativ təhsil müddətində bakalavriat səviyyəsini başa vurmayıb. Onlardan 6 738 nəfər (28,17 faiz) müxtəlif səbəblərdən ali təhsil müəssisələrindən xaric edilib.

Xaric olunanların 3 950 nəfəri (58,62 faiz) 3-cü kursa qədər, 3 121 nəfəri (46,32 faiz) isə 2-ci kursa qədər təhsil alıb. 456 nəfər (67,62 faiz) isə 1-ci kursdan sonra ali təhsil müəssisəsindən xaric olunub.

Araşdırmada bildirilib ki, xaric olunan 6 738 nəfərin 5 824-ü (86,44 faiz) qızlar, 914-ü (13,56 faiz) isə oğlanlar olub.

Təhsilalma formasına görə isə xaric olunanların 1 854 nəfəri (27,52 faiz) dövlət sifarişi, 4 884 nəfəri (72,48 faiz) ödənişli əsaslarla qəbul olunan tələbələrdir.

İxtisas qrupları üzrə göstəricilərə nəzər saldıqda, xaric olunanların 2 222 nəfəri I qrup, 1 780-i II qrup, 1 516-sı III qrup, 578-i IV qrup, 642-si isə V qrup üzrə ali məktəblərə qəbul olub.

Araşdırmaya görə, I-IV ixtisas qrupları üzrə ali məktəblərə qəbul olub sonradan xaric olunanların 52,31 faizi 150-300, 34,76 faizi 300-500, 12,93 faizi isə 500-700 bal aralığında nəticə göstərib.

V ixtisas qrupu üzrə isə xaric olunanların 85,98 faizi 30-100, 13,71 faizi 100-200, cəmi 0,31 faizi 200-300 bal aralığında nəticə göstərərək ali təhsil müəssisələrinə qəbul olub.

Araşdırmada qeyd olunur ki, ali təhsil müəssisələrində tələbələrin təhsilini normativ müddətdə başa vura bilməməsinin səbəbləri arasında müxtəlif amillər yer alır.