Müəllimlər üçün mühüm qayda: direktorun əmrinə nə zaman “yox” demək olar?

Müəllim–rəhbər münasibətlərini tənzimləyən mövcud qaydalar müəllimlərin vəzifə öhdəliklərini və etik davranış prinsiplərini müəyyən edir.

Təhsilverənlərin iş zamanı rəhbər göstərişlərinə necə yanaşmalı olduqları, həmçinin hüquq və vəzifələri aydın şəkildə göstərilir. Burada həm qanuni tapşırıqların yerinə yetirilməsi, həm də etik normalara əməl edilməsi əsas prinsip kimi qeyd olunur.

Bəs bu qaydalar müəllim-rəhbər münasibətlərində praktikada necə tətbiq olunur və hansı hallarda fərqli yanaşma ortaya çıxa bilər?

AzEdu.az-ın “Müəllimlərin etik davranış Qaydaları”na istinadən verdiyi xəbərə görə, müəllimlər rəhbərin qanunauyğun yazılı əmrlərini, sərəncamlarını və şifahi tapşırıqlarını yerinə yetirməyə borcludurlar.

Bu, onların əsas vəzifə öhdəliklərindən biri kimi müəyyən edilir.

Qanunsuz tapşırıq verildikdə nə baş verir?

Müəllim ona verilən göstərişin qanuna və ya normativ hüquqi akta zidd olduğuna əmindirsə, həmin tapşırığı yerinə yetirməkdən imtina edə bilər.

Bu barədə yazılı əsaslandırmanı birbaşa rəhbərliyə və ya yuxarı orqana təqdim etməlidir.

Qanuni göstərişlərə əməl olunmamasının nəticəsi nədir?

Qanuni rəhbər göstərişlərinin yerinə yetirilməməsi müəllim üçün intizam məsuliyyəti yaradır.

Müəllimlə rəhbər arasında münasibətlər qarşılıqlı hörmət və peşə etikası əsasında qurulmalıdır.

Müəllim məlumat verərkən nəyə diqqət etməlidir?

Müəllim rəhbərə həmkarları barədə bilərəkdən yalan və ya təhrif olunmuş məlumat verməməli, məlumatı təqdim etməzdən əvvəl onun düzgünlüyünü dəqiqləşdirməlidir.