Sumqayıtda “Esmanur” uşaq bağçası ilə bağlı narazılıq: Valideynlər qida keyfiyyətindən şikayət edir

Sumqayıt şəhəri, 10-cu mikrorayonda yerləşən “Esmanur” uşaq bağçası ilə bağlı valideynlər tərəfindən narazılıqlar səsləndirilib. Şikayətçi valideynlər məsələ ilə bağlı Xeberle.com-a müraciət edərək bildiriblər ki, bağçada uşaqlara təqdim olunan qidalar vəd edilən menyuya uyğun deyil.
Valideynlərin sözlərinə görə, menyuda göstərilən qidalar əvəzinə uşaqlara daha keyfiyyətsiz məhsullar verilir və bu vəziyyət artıq bir neçə aydır davam edir.
“Bizə hər şey sadəcə görüntü olaraq təqdim olunur. Daim kamera problemi yaşayırıq”, – deyə valideynlər bildiriblər.
Onların sözlərinə görə, bağça ötən ilin dekabr ayından qrant layihəsinə daxil edilib və bu çərçivədə müxtəlif vədlər verilib. Lakin valideynlər iddia edir ki, həmin vədlər bu günə qədər yerinə yetirilməyib:
“Şikayət etdikdə hər ay ‘düzələcək’ deyilir. Uşaq başına 400 manat ödəniş olunur, amma nə qida, nə də digər xidmətlər bu məbləğə uyğun deyil”.
Məsələ ilə bağlı bağçanın işdən azad olunmuş tərbiyəçisi Pərvanə Ağayeva da iddiaları təsdiqləyib. Onun sözlərinə görə, uşaqların qidalanmasında ciddi çatışmazlıqlar var:
“Uşaqların yeməklərindən kəsilir. Hansı valideyn istəyər ki, ciyərdən uşaqlara dolma verilsin? Şirniyyat saatı ləğv edilib. Yazırlar ki, müxtəlif meyvələr verilir, amma faktiki olaraq yalnız bir növ meyvə təqdim olunur”, – deyə o qeyd edib.
Digər tərəfdən, bağçanın müdiri İlahə Xusiyeva bildirib ki, Pərvanə Ağayeva işində yol verdiyi nöqsanlara görə vəzifəsindən uzaqlaşdırılıb. Müdirin sözlərinə görə, keçmiş əməkdaşın səsləndirdiyi iddialar qərəzlidir və bağça rəhbərliyinə qarşı təxribat xarakteri daşıyır.
Məsələ ilə bağlı aidiyyəti qurumların mövqeyi isə hələlik açıqlanmayıb.