Məktəblilərimiz XVII Beynəlxalq İnformatika Turnirində uğur qazanıblar
15-18 aprel 2026-cı il tarixlərində Bolqarıstanın Şumen şəhərində informatika fənni üzrə XVII Beynəlxalq İnformatika Turniri təşkil edilib. 14 ölkədən ümumilikdə 440 iştirakçının yarışdığı turnir hibrid formada keçirilib. Məktəblilərimiz yarışa Azərbaycan Texniki Universitetinin laboratoriyasından onlayn qoşulublar.
Aztəhsil.az xəbər verir ki, Bakı şəhər 157 nömrəli tam orta məktəbin XI sinif şagirdi Həsən Vəliyev qızıl medala, Göyçay şəhər akademik Ziya Bünyadov adına 3 nömrəli tam orta məktəbin IX sinif şagirdi Vaqif Abdullayev və Bakı şəhər Fizika, riyaziyyat və informatika təmayüllü liseyin IX sinif şagirdi Tuncay Paşayev gümüş medala, Bakı Türk Anadolu Liseyinin XI sinif şagirdi Əhməd Qəmbərli isə bürünc medala layiq görülüblər.
Xatırladaq ki, 2017-ci ildən etibarən məktəblilərimizin beynəlxalq fənn olimpiadaları və müsabiqələrə hazırlıq prosesi “Azercell Telekom” MMC-nin dəstəyi ilə həyata keçirilir. Bu müddət ərzində Azərbaycanın bölgə və paytaxt məktəblərində təhsil alan şagirdlərimiz fərqli yaş qrupları üzrə müxtəlif miqyaslı proqramlaşdırma müsabiqələrində ümumilikdə 118 medal qazanıblar.
