Dərsə geçikən tələbələrə davamiyyətdə güzəşt olacaq? - RƏSMİ

“Bakı Metropoliteni” QSC-nin bütün stansiyalarında sərnişin girişinə müvəqqəti məhdudiyyət tətbiq edilib. Rəsmi məlumata görə, metropolitenin fəaliyyəti yaxın bir saat ərzində bərpa olunacaq.

Yaranmış vəziyyətlə əlaqədar 2-ci növbədə təhsil alan tələbələrin dərsə gecikməsi ehtimal edilir.

Bu halda tələbələrin davamiyyətinə hər hansı güzəştlərin tətbiqi məsələsi aktuallaşır.

Mövzu ilə bağlı AzEdu.az Təhsil Portalı ali təhsil müəssisələrinə sorğu ünvanlayıb.

Sorğumuza cavab olaraq Bakı Dövlət Universitetindən (BDU) bildirilib ki, metro stansiyalarında yaranmış müvəqqəti problemlə əlaqədar tələbələrin davamiyyəti nəzərə alınacaq.

Azərbaycan Dövlət Pedaqoji Universitetindən (ADPU) qeyd edilib ki, ilk saatlar üçün gecikmələr nəzərə alınacaq.

Azərbaycan Tibb Universitetindən (ATU) bildirilib ki, tələbələrdən daxil olan bütün müraciətlərə ATU rəhbərliyi tərəfindən həssaslıqla yanaşılır və daim diqqətdə saxlanılır:

"O cümlədən tələbələrdən asılı olmayan müxtəlif məsələlər üzündən dərsə davamiyyətin pozulmasına səbəb ola biləcək, tələbənin dərsdə iştirakının təmin olunmasına maneə yaradan hallar hər zaman nəzərə alınır.
Bakı Metropolitenində baş vermiş müvəqqəti texniki problemə gəlincə, bununla bağlı tələbələrdən universitetimizə hələ ki heç bir müraciət daxil olmayıb".

Azərbaycan Dövlət İqtisad Universitetindən (UNEC) verilən məlumata əsasən, bununla bağlı tələbələr tərəfindən müraciət daxil olmayıb.

Azərbaycan Texniki Universitetindən (AzTU) məlumat verilib ki, metroda yaranan texniki problemlə əlaqədar tələbələr arasında dərsə kütləvi formada gecikmə qeydə alınmayıb.

Azərbaycan Memarlıq və İnşaat Universitetindən (AzMİU) bildirilib ki, məsələ ilə bağlı tələbələr tərəfindən dekanlığa müraciət olmayıb.

"Əgər müraciət daxil olarsa, əlbəttə ki nəzərə alınacaq".

Azərbaycan Mədəniyyət və İncəsənət Universitetindən (ADMİU) qeyd edilib ki, tələbələrin davamiyyətində problem yaranmayıb.

Xəzər Universitetindən əldə etdiyimiz məlumata görə, davamiyyətlə bağll universitə şikayət daxil olmayıb.