Bu uşaq məktəbə getmirdi? - Deputatdan ETİRAZ

"Ucar rayonunda 15 yaşlı yeniyetmənin övlad dünyaya gətirməsi həyəcan təbilidir. 2011-ci il təvəllüdlü qız uşağının, özünun qayğıya ehtiyacı olan körpənin ana olması heç bir mənəvi, etik və hüquqi çərçivəyə sığmır. Uşağın gələcəyinin, uşaqlığının əlindən alınması faciədir".

Bu fikirləri Redaktor.az-a açıqlamasında Milli Məclisin deputatı, Ana Vətən Partiyasının sədri Günay Ağamalı bildirdi.

Onun sözlərinə görə, Azərbaycan qanunvericiliyi uşaqların hüquqlarını qəti şəkildə qoruyur:

"Sözügedən qanunları pozanlar ən ağır şəkildə cəzalandırılmalıdırlar. Daxili İşlər Nazirliyi tərəfindən cinayət işinin açılmasını təqdir edirəm. Bu cinayətin arxasında duran hər bir kəs, cinayəti törədənlər, məsuliyyət daşıyan valideynlər qanun qarşısında cavab verəcəklər. ​Biz hara baxırıq? Bu uşaq məktəbə getmirdi? Ailəni tanıyanlar niyə susub? Bir uşağın 7-8 aylıq hamiləliyi necə ola bilər ki, diqqətdən yayınsın? Bu hadisə onu göstərir ki, bəzi bölgələrimizdə hələ də orta əsr təfəkkürü ilə yaşayan, qız uşaqlarını təhsildən yayındırıb evləndirməyi çıxış yolu görənlər mövcuddur".

Millət vəkili əlavə etdi ki, güclü qadın güclü cəmiyyət deməkdir.

"Qız uşağını 15 yaşında ana olmağa məhkum etmək sağlam cəmiyyətin təməlinə balta vurmaqdır. Qeyri Hökumət Təşkilatlarını və ictimai fəalları bu cür hallara qarşı sıfır tolerantlıq nümayiş etdirməyə səsləyirəm. Uşaqlarımızın cəhalətin və cinayətin qurbanına çevrilməyinə imkan verməməliyik.

​15 yaşlı uşağın əlindən alınan təkcə oyuncaqları deyil, onun təhsilidir, xoşbəxtliyidir, psixologiyasının və hüquqlarının pozulmasıdır", - deyə Günay Ağamalı vurğuladı.