Azərbaycanın təhsil işçiləri Türkiyəyə 300 milyon lirədən çox yardım edib

Bu ilin fevral ayında qardaş Türkiyədə baş vermiş dəhşətli zəlzələ ilə əlaqədar təhsil işçiləri Azərbaycan Gənc Müəllimlər Assosiasiyasının təşəbbüsü ilə başlanan könüllü yardım kampaniyasına qoşulublar.

Elm və Təhsil Nazirliyindən "tehsilmedia.info"a bildirilib ki, assosiasiyanın həyata keçirdiyi kampaniyaya regional təhsil idarələri, ali, ümumi və orta ixtisas təhsili müəssisələri, eləcə də elm və təhsil işçiləri fərdi şəkildə yardım göstəriblər. Ümumilikdə 72 100 elm və təhsil işçisi yardım kampaniyasına ianə edib.

Kampaniyanın yekununda dəstək məqsədilə toplanan maddi yardımın məbləği ümumilikdə 2 milyon 741 min 153,97 manat olub. Bu da təxminən 310 milyondan çox türk lirəsini əhatə edir.

Qardaş ölkəyə yardım məqsədilə ümumi və məktəbəqədər təhsil müəssisələri ümumilikdə 144 milyon 860 min 841 manat, ali təhsil müəssisələri 83 milyon 940 min 134 manat, orta ixtisas təhsili müəssisələri 6 milyon 557 min 875 manat, şəxsi hesablarından ödəyən elm və təhsil işçiləri isə 38 milyon 756 min 547 manat ianə ediblər.

Qeyd edək ki, təhsil işçilərinin topladığı yardım Prezident İlham Əliyevin tapşırığı ilə Türkiyəyə yardım çərçivəsində təhsil müəssisələrinin tikintisinə sərf ediləcək.