Gömrük Akademiyasının "Brend tələbə"ləri mükafatlandırılıb - FOTOLAR
AzEdu.az Təhsil Portalı və ali məktəblərin birgə təşkilatçılığı ilə həyata keçirilən "Brend tələbə" layihəsi çərçivəsində xüsusi meyarlara uyğun seçilən tələbələrin mükafatlandırılması davam edir.
Noyabrın 25-də AzEdu.az və Dövlət Gömrük Komitəsinin Akademiyasının (DGKA) birgə təşkilatçılığı ilə burada təhsil alan “Brend tələbə”lər təltif ediliblər.
Tədbirdə AzEdu.az Təhsil Portalının direktoru Ləman Novruzova, müxbiri Esmira Əliyeva, portalın PR meneceri Gülnarə Məmmədova, Akademiyanın rəis müavinləri Cəmilə Namazova, Anar Süleymanov, Katibliyin rəisi Azər Seyidov, Tədris-metodiki işin təşkili şöbəsinin rəisi İslam Hüseynov, Monitorinq və qiymətləndirmə şöbəsinin rəisi Əbilxan İsayev və həmin statusa layiq görülmüş tələbələr iştirak ediblər.
Mükafatlandırma mərasimi Cəmilə Namazovanın nitqi ilə başlayıb.
O, “Brend tələbə” layihəsinə görə AzEdu.az-a təşəkkürünü bildirib, gəncləri təbrik edib və hər birinə gələcək fəaliyyətlərində uğurlar arzulayıb:"Hər ali təhsil müəssisəsinin özünəməxsus keyfiyyət kateqoriyalarını əks etdirən seçilmiş tələbələri olur. Layihəyə əsasən həmin təhsilalanlar “Brend tələbə” olaraq seçilirlər. Necə ki, hər hansı bir məhsul istehsal edilərkən onun keyfiyyət göstəriciləri birləşdirilərək ölkəni təmsil etməyə hazırlayırlar və belə məhsul brend məhsulu adlanır, eləcə də təhsil sistemində “Brend tələbə”lər həmin ali təhsil müəssisəsini bütün keyfiyyət kateqoriyalarında təmsil edən tələbələrdir. Onlar təhsil, tərbiyə, bacarıq və şəxsi keyfiyyətlər baxımından yüksək səviyyəyə malik olduqları üçün mükafatlandırılırlar.
Sözün düzü, akademiyamızda bu layihəyə layiq tələbələrimiz çoxdur. Lakin bu gün biz həmin tələbələrin ən yaxşılarını seçməyə çalışırıq. Hesab edirəm ki, bu tələbələr həm Azərbaycanda, həm də xaricdə müxtəlif tədbirlərdə ölkəmizi layiqincə təmsil etmək iqtidarına malikdirlər. “Brend tələbə” adını qazanmış bütün tələbələrimizi bir daha təbrik edirəm və gələcəkdə də qarşılarına qoyduqları planları uğurla həyata keçirərək Azərbaycanı və akademiyamızı layiqincə təmsil etmələrini arzu edirəm".
Daha sonra çıxış üçün Ləman Novruzovaya söz verilib. O, “Brend tələbə”adına layiq görülən tələbələri təbrik edib:“Yüzlərlə tələbə arasından seçilən 10 nəfərdən biri olmaq həm böyük fəxr, həm də ciddi məsuliyyətdir. Bu, təhsil aldığınız ali məktəbin göstərdiyiniz əzmi, bacarığınızı və nailiyyətlərinizi yüksək qiymətləndirdiyinin açıq göstəricisidir. “Brend tələbə” adına layiq olmanız təsadüf deyil. Bu, zəhmətinizin və yüksək keyfiyyətlərinizin nəticəsidir. İnanıram ki, gələcəkdə də bu etimadı doğruldacaq, uğurlarınızı daha da artıracaqsınız.
Artıq 3 ildir ki, AzEdu.az Təhsil Portalı bu layihəni uğurla həyata keçirir. İlk illərdə 20 universitetin iştirak etdiyi layihəyə bu dəfə 29 ali məktəb qoşulub. Qarşıdakı məqsədimiz isə Azərbaycanın bütün universitetlərini bu təşəbbüs ətrafında birləşdirməkdir. Bu görüşə qatıldığınız üçün hər birinizə təşəkkür edir, həyatınızda yeni uğurlar arzulayıram".
Akademiyanın rəis müavini Anar Süleymanov isə tələbələrin hər birinin müəyyən meyarlara cavab verən uğurlarından danışıb, onları təbrik edib:
"Bu layihə yalnız sertifikatın təqdim edilməsi və 10 tələbənin digər tələbələrdən seçilərək mükafatlandırılması ilə bağlı deyil, eyni zamanda müxtəlif təhsil müəssisələrindən seçilmiş tələbələr arasında şəbəkələşməyə də imkan yaradacaq. 10 tələbədən biri olmaq həm xoşbəxtlik, həm də böyük fürsətdir. Bütün tələbələrimizi təbrik edir, sizlərə isə ayrıca təşəkkürümü bildirirəm.
Növbəti mərhələdə tələbələr hər biri özləri barədə qısa məlumat veriblər.
Sonda isə “Brend tələbə”lərə təltifnamələri təqdim olunub və xatirə şəkli çəkilib.
2024-2025-ci tədris ili üzrə Dövlət Gömrük Komitəsinin Akademiyasının "Brend tələbə" statusuna layiq görülmüş gəncləri aşağıdakılardır:
Məsumə Cəbrayılzadə-Hüquqşünaslıq ixtisasının tələbəsi;
Aybəniz Gözəlova-Hüquqşünaslıq ixtisasının tələbəsi;
Ləman Əlicanova-Hüquqşünaslıq ixtisasının tələbəsi;
Ayla Ədilova-Hüquqşünaslıq ixtisasının tələbəsi;
Toğrul İsmayılov-Beynəlxalq ticarət va logistika ixtisasının tələbəsi;
Osman Müşəyev-Beynəlxalq ticarət va logistika ixtisasının tələbəsi;
Zaur Həsənxanlı- İqtisadiyyat ixtisasının tələbəsi;
Asif Əkbərli- İnformasiya təhlükəsizliyi ixtisasının tələbəsi;
Sineyvər Əhmədova-İnformasiya texnologiyaları ixtisasının tələbəsi;
Ellada Abdinova-Beynəlxalq ticarat va logistika ixtisasının tələbəsi.
