AzMİU QS tərəfindən “5 Stars” sertifikatı ilə təltif olunub
Azərbaycan Memarlıq və İnşaat Universiteti (AzMİU) beynəlxalq ali təhsil reytinqləri üzrə dünyanın ən nüfuzlu qurumlarından biri olan Quacquarelli Symonds (QS) tərəfindən “5 Stars” sertifikatına layiq görülüb. Sertifikatın rəsmi təqdimat mərasimi Cənubi Koreyanın paytaxtı Seul şəhərində keçirilib.
AzEdu.az xəbər verir ki, tədbirdə AzMİU-nu universitetin nümayəndə heyəti təmsil edib. Mərasimə dünyanın müxtəlif ölkələrindən tanınmış universitet rəhbərləri, akademiklər və təhsil ekspertləri qatılıb.
AzMİU “QS Stars Rating System” çərçivəsində aparılan çoxşaxəli qiymətləndirmə nəticəsində tədrisin keyfiyyəti, məzunların karyera imkanları, tədqiqat göstəriciləri, müəllim–tələbə nisbəti, inklyuzivlik və beynəlmiləlləşmə kimi əsas meyarlar üzrə yüksək nəticələr göstərərək “5 Stars” statusunu qazanıb.
Təqdimat mərasimində çıxış edən AzMİU nümayəndələri bu uğurun universitetdə son illər aparılan elmə və innovasiyaya əsaslanan islahatların, keyfiyyət təminatı mexanizmlərinin təkmilləşdirilməsinin və dayanıqlı inkişaf prinsiplərinin tədris və idarəetmə proseslərinə inteqrasiyasının məntiqi nəticəsi olduğunu qeyd ediblər.
Çıxışlarda, həmçinin vurğulanıb ki, “5 Stars” sertifikatı AzMİU-nun beynəlxalq aləmdə nüfuzunun artmasının, qlobal akademik məkanda etibarlı tərəfdaş kimi qəbul edilməsinin və universitetin strateji inkişaf planında nəzərdə tutulan məqsədlərə doğru irəliləməsinin mühüm göstəricisidir. Bildirilib ki, QS sisteminin hərtərəfli təhlilləri universitetin gələcək inkişaf prioritetlərinin müəyyən edilməsində mühüm istinad mənbəyi olacaq.
Mərasim çərçivəsində QS-in rəsmi nümayəndələri tərəfindən AzMİU nümayəndə heyətinə “5 Stars” sertifikatı və rəsmi nişanı təqdim edilib.
Bu uğur AzMİU-nun beynəlxalq arenada tanınmasının güclənməsi, qlobal akademik mühitə inteqrasiyasının dərinləşməsi və dayanıqlı ali təhsil modellərinin tətbiqində lider mövqeyinin daha da möhkəmlənməsi baxımından mühüm əhəmiyyət kəsb edir.
