Musiqi ədəbiyyatı fənni üzrə elektron sınaq imtahanı keçiriləcək

tehsilmedia.info xəbər verir ki, sınaq imtahanı Dövlət İmtahan Mərkəzinin Bakı şəhəri, Nəsimi rayonu, Abdulvahab Salamzadə küçəsi, 28 ünvanında (8 Noyabr metrostansiyasının yanı) yerləşən binasında kompüterlər vasitəsilə keçiriləcək.

İmtahan saat 10:00-da və 12:00-da başlanır. Saat 10:00-da keçiriləcək imtahan üçün 50 nəfər, 12:00-da olan imtahan üçün isə 26 nəfər qeydiyyatdan keçib.

İştirakçı imtahanın başlanmasından ən az 1 saat öncə imtahan binasına gəlməlidir. İmtahan binasına daxil olarkən iştirakçı şəxsiyyətini təsdiq edən sənədi təqdim etməlidir (iştirakçının şəxsiyyəti təsdiq edən sənədi olmadıqda şəxsiyyət vəsiqəsinin notarial qaydada təsdiq olunmuş surətini və ya ümumvətəndaş pasportunu təqdim edə bilər). Əcnəbilər və vətəndaşlığı olmayan şəxslər Dövlət Miqrasiya Xidməti tərəfindən verilmiş icazə vəsiqələrini, qaçqın statusu almış xarici vətəndaşlar və onların ailə üzvləri isə qaçqın vəsiqələrini təqdim edirlər. Tələb olunan sənədi təqdim etməyən iştirakçı imtahan binasına buraxılmayacaq.

İmtahanın müddəti 1 saatdır. İştirakçılara musiqi ədəbiyyatı fənni üzrə musiqi məktəblərinin tədris proqramı əsasında tərtib edilmiş 30 qapalı tipli test tapşırığı təqdim olunacaq. Tapşırıqların 20-si Azərbaycan, Avropa və rus bəstəkarlarının həyat və yaradıcılığını, həmçinin müxtəlif bədii üslublara və dövrlərə aid biliklərin yoxlanılmasını əhatə edir. 10 sual isə musiqi nümunələrinin təyin edilməsi üçün nəzərdə tutulub.

Biliklərin qiymətləndirilməsi 10 ballıq şkalada aparılır.