ADAU-nun bir qrup əməkdaşı Türkiyənin Diclə Universitetində olublar - FOTO
Azərbaycan Dövlət Aqrar Universitetinin (ADAU) tədris işləri üzrə prorektoru Əhməd Məlikov, Beynəlxalq əməkdaşlıq və əcnəbi tələbələrlə iş şöbəsinin müdiri Urfan Tağıyev və mütəxəssisi Sevil Həsənova Erasmus+ proqramı çərçivəsində Türkiyənin Diclə Universitetinə ezam olunublar.
tehsilmedia.info xəbər verir ki, səfər zamanı ADAU-nun əməkdaşları Dicle Universitetinin rektoru, professor Mehmet Karakoçla görüşüblər. Görüş zamanı iki universitet arasında əməkdaşlığın inkişafının, tələbə-müəllim mübadiləsinin, ikili diplom proqramının həyata keçirilməsinin, təcrübə-tədqiqat sahəsində qarşılıqlı bilik və nailiyyətlərinin bölüşdürülməsinin önəmi vurğulanıb.
Həmçinin, nümayəndə heyəti Diclə Universitetinin Aqronomluq fakültəsinin laboratoriyaları, tədris-təcrübə təsərrüfatı, auditoriyaları və eyni zamanda Baytarlıq fakültəsi ilə də tanış olublar.
Gələcəkdə birgə ikili diplom proqramlarının həyata keçirilməsi, müəllim-tələbə mübadiləsi və birgə tədqiqat işlərinin aparılması barədə razılığa da gəlinib.
