ARTİ tərəfindən metodik görüşlər davam edir
Ümumi təhsil müəssisələrində müəllimlərin peşəkar inkişafına töhfə verən “Müasir metodist” layihəsi çərçivəsində həyata keçirilən fəaliyyətlər uğurla davam edir. Layihə çərçivəsində 2024-cü ilin dekabr ayında müxtəlif mövzularda metodik görüşlər təşkil edilib. Görüşlərin əsas məqsədi müəllimlərin metodiki bacarıqlarını inkişaf etdirmək, onların təlim ehtiyaclarını təmin etmək və tədris keyfiyyətini daha da yüksəltməkdir.
Bu barədə Təhsil İnstitutundan məlumat verilib.
Bildirilib ki, keçirilən görüşlərin mövzuları əvvəlcədən müşahidə edilən dərslərin nəticələrinə əsasən müəyyən edilib. Metodik görüşlər metodistlər və müəllimlərin əməkdaşlığı ilə həyata keçirilib. Metodik görüşlər zamanı dərs prosesinin təhlili aparılıb, müşahidə olunan çatışmazlıqlar müzakirə edilib. Bununla yanaşı, müəllimlər arasında təcrübə mübadiləsi təşkil olunub və yeni biliklərin tətbiqi üçün imkanlar yaradılıbMetodik görüşlərin üstünlüklərindən biri də müəllimlər arasında səmimi və dəstəkləyici iş mühitinin formalaşdırılmasıdır. Metodik görüşlərdə müəllimlər aktiv iştirak edib, kollektiv müzakirələr vasitəsilə problemlərin həll yollarına birlikdə nail olublar.
Növbəti mərhələdə layihə çərçivəsində müəllimlərin spesifik metodiki ehtiyaclarına uyğun olaraq daha dərin və tətbiqə əsaslanan təlimlərin keçirilməsi planlaşdırılır. Bu təlimlər vasitəsilə müəllimlərin peşəkarlıq səviyyəsinin artırılması, tədris prosesinin effektivliyinin yüksəldilməsi və şagird nailiyyətlərinin yaxşılaşdırılması nəzərdə tutulur.
“Müasir metodist” layihəsi ümumitəhsil müəssisələrində fəaliyyətə başlayan metodistlər tərəfindən uğurla koordinasiya edilir və ümumi təhsil müəssisələrinin inkişafına mühüm töhfə verməkdədir. “Müasir metodist” layihəsi çərçivəsində həyata keçirilən fəaliyyətlər, şagirdlərin akademik nailiyyətini artırmaq və daha səmərəli tədris mühitinin yaradılması məqsədini daşıyır.
