Coğrafiya İnstitutunun əməkdaşları Gürcüstanda keçirilən beynəlxalq tədbirdə iştirak ediblər

Elm və Təhsil Nazirliyinin Akademik H.Əliyev adına Coğrafiya İnstitutunun əməkdaşları icraçı direktor c.ü.f.d., dosent Zaur İmrani, böyük elmi işçi c.ü.f.d., dosent Elina Kərimova, elmi işçisi Bəyimxanım Hüseynova və doktorant Aslan Babaxanov Tbilisidə keçirilən “Nəzəriyyədən təcrübəyə: Gürcüstanda Muxuri-Geopark təşəbbüsünə çoxtərəfli elmi dəstək” mövzusunda rəqəmsal qiymətləndirmə görüşündə iştirak ediblər.

İnstitutdan "tehsilmedia.info" a bildirilib ki, görüşdə Gürcüstanın V.Baqratoni adına Coğrafiya İnstitutu və İ.Cavaxisvili adına Tbilisi Dövlət Universiteti, Almaniyanın Y.Libix adına Gissen Universitetinin Coğrafiya departamentinın və CENN-in (Qafqaz Ətraf Mühit QHT) əməkdaşları onlayn qoşulublar.

Tədbirdə dünyada baş verən iqlim dəyişmələri fonunda yaranan ekoloji problemlər və onlardan çıxış yolları, geoparkların təcrübəsi, onların yaradılmasının üstünlükləri, eləcə də Gürcüstanda Muxuri Geoparkının yaradılmasının nəzəri təcrübəsi barədə çıxışlar olub, geoparkların məlumat bazasının idarə edilməsi sistemi barədə məlumatlar verilib.

Gələcəkdə Coğrafiya İnstitutu ilə Gissen Universitetinin Coğrafiya departamenti arasında elmi əlaqələrin gücləndirilməsi, tələbə mübadiləsi, birgə layihələrdə iştirak barədə fikir mübadiləsi aparılıb.